სტრატეგია აღმაშენებლის ლიდერის, გიორგი ვაშაძის განცხადებით, ოპოზიციას ახლა "სტრატეგიული დუმილის" გზა აქვს არჩეული. ამის შესახებ მან TV პირველის ეთერში ისაუბრა.

"სტრატეგიული დუმილი გვაქვს ახლა არჩეული. ვაცადოთ და ხალხმაც დაინახოს მათი იდეალური სახე. რას ხედავენ? რომ მთავრობაში არაფერი იცვლება; ხედავენ, რომ ბიუჯეტი დაამტკიცეს, რომელიც არცერთ პროექტს არ ითვალისწინებს, რამაც შეიძლება ეკონომიკურად რამე სიკეთე მოუტანოს ქვეყანას", — განაცხადა მან.

საქართველოს მე-10 მოწვევის პარლამენტი, რომელსაც ოპოზიცია ლეგიტიმურად არ სცნობს, 11 დეკემბერს შეიკრიბა. ერთპარტიულმა პარლამენტმა უკვე დაამტკიცა მთავრობის აპარატი. მმართველ პარტიასა და ოპოზიციას შორის კი, მოლაპარაკებები გრძელდება და საზოგადოება კვლავ მე-5 რაუნდის მოლოდინშია. მხარეები არ აზუსტებენ როდის გაიმართება მორიგი შეხვედრა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.