ახლადარჩეული პრემიერმინისტრის, გიორგი გახარიას განცხადებით, იუსტიციის ყოფილი მინისტრი, თეა წულუკიანი მთავრობაში ძალიან დააკლდათ. ის ნაწილობრივ ადასტურებს, რომ, შესაძლოა, წულუკიანი დეპუტატის რანგიდან ისევ მთავრობაში დაბრუნდეს.

"თეა წულუკიანი, როგორც პრემიერმინისტრი გეუბნებით, საქართველოს მთავრობაში და კაბინეტში ძალიან დაგვაკლდა. რა ფორმით დაბრუნდება, ვნახოთ", — განაცხადა მან.

ქართული ოცნების ყოფილი და ყველაზე ხანგრძლივმოქმედი მინისტრი, ამჟამად კი პარლამენტის დეპუტატი წულუკიანი ამბობს, რომ ჯერ უნდა მოხდეს სტრუქტურული ცვლილებები და მერე იმსჯელებს, იქნება თუ არა კულტურის მინისტრი.

"თუ შემომთავაზებენ, სერიოზულად დავფიქრდები, როგორც ყველა სერიოზულ შემოთავაზებაზე", — განაცხადა წულუკიანმა.

მისი თქმით, მას შემდეგ, რაც კულტურის სამინისტრო, როგორც დამოუკიდებელი უწყება გაუქმდა და რამდენიმე სამინისტრო გაერთიანდა, კულტურის სფეროს ინტერესები "ჩაიკარგა" სხვა სფეროებში და სამთავრობო გუნდს ამის გამოსასწორებლად უმსჯელია.

თეა წულუკიანი, რომელიც 8 წლის განმავლობაში იკავებდა იუსტიციის მინისტრის პოსტს და ქართული ოცნების ყველაზე გრძელვადიან მინისტრად ითვლება, მე-10 მოწვევის პარლამენტის განათლების, მეცნიერებისა და კულტურის კომიტეტის თავმჯდომარე გახდა.