ქართული ოცნების ერთ-ერთი ლიდერის, ირაკლი კობახიძის განცხადებით, 2019 წლის 20 ივნისს გავრილოვი პარლამენტში სავარძელზე არ უნდა მჯდარიყო. ამ ფაქტს კობახიძე "პროვოკაციას" უწოდებს. აღნიშნული განცხადება მან პალიტრანიუსის ეთერში გააკეთა.

"ვერ გაითვალა, რომ ასეთი პროვოკაცია შეიძლებოდა მიგვეღო. მიუხედავად იმისა, რომ თავი დავიზღვიეთ ყველაფრისგან, ანუ არ უნდა მჯდარიყო გავრილოვი ამ შემთხვევაში სავარძელში. თავი გვქონდა დაზღვეული, ასე ვფიქრობდით, თუმცა პროვოკაცია ვერ გავთვალეთ, რაც, ასევე, შეცდომა იყო. ეს პროვოკაცია იყო გავრილოვის მხრიდან. შეთანხმებული იყო წინასწარ სეკრეტარიატთან და სამდივნოსთან, ვინ უნდა მჯდარიყო სავარძელში — ეს იყო ბერძენი გენერალური მდივანი. როცა ეს იცი და შეგენებულად ამას აკეთებ, ეს შეიძლება შეფასდეს პროვოკაციულად", — განაცხადა კობახიძემ.

2019 წლის 20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეები და ოპოზიციის წევრები ითხოვდნენ პარლამენტის თავმჯდომარის, სუს-ის ხელმძღვანელის და შს მინისტრის გადადგომას.

მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.