ქართული ოცნების აღმასრულებელი მდივნის, ირაკლი კობახიძის აზრით, ქართულ ოცნებას უფრო მეტად "უჭრის ჭკუა", ვიდრე ევროპული საქართველოს ლიდერებს. მისივე თქმით, პოზიციების მხრივ, ქართული ოცნება უფრო მომგებიანად დგას "საჭადრაკო დაფაზე".

"ჭადრაკი რომ წარმოვიდგინოთ, ოპოზიციას ორი სვლა აქვს მაქსიმუმ, ჩვენ გვაქვს შვიდი, რვა, ცხრა სვლა. ბევრად ძლიერი პოზიციები გვაქვს ამ საჭადრაკო დაფაზე და ბუნებრივია ამას მაქსიმალურად გამოვიყენებთ, მით უმეტეს, რომ ჭკუაც ცოტა მეტად გვიჭრის, ვიდრე ოპოზიციის კონკრეტულ წარმომადგენლებს, მაგალითად, იგივე ევროპული საქართველოს ლიდერებს", — ამბობს კობახიძე რუსთავი 2-ზე, დღის კურიერის ეთერში.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.