თბილისის მერი, კახა კალაძე განმარტავს სლოგანს "სოლიდარობით სავსე ქალაქი". სწორედ ეს წარწერაა წელს განთავსებული თავისუფლების მოედანზე, წმინდა გიორგის მონუმენტთან. კალაძის თქმით, "სოლიდარობა გადაგვალახინებს შიშსაც, პანდემიასაც". მან პარალელი გაავლო 13 ივნისის ტრაგედიასთან და აღნიშნა, რომ "მაშინ მგლოვიარე თბილისის ნუგეში ჩვენი ერთობა იყო".

"იგივე გვინდა ახლაც, იმიტომ, რომ სოლიდარობაშია ძალიან დიდი ძალა და გადარჩენა. ჩვენ ჰაერივით გვჭირდება ერთობა, ერთიანი საზეიმო განწყობის შექმნა, კეთილი სიტყვა, კეთილი გულით გაკეთებული საქმეები, რომ ბავშვები არ დაითრგუნონ, მოხუცებმა მიტოვებულად არ იგრძნონ თავი. თბილისელებს და ჩვენი ქვეყნის თითოეულ მოქალაქეს დაძაბულობა და შფოთი მოეხსნათ და თუნდაც სულ პატარა საზეიმო განწყობა შეიქმნას. სოლიდარობა გადაგვალახინებს შიშსაც, პანდემიასაც. ჩვენ ახალი იმედებით დავიწყებთ ახალ წელს — ყველა ერთად, ერთმანეთის გვერდში დგომით", — თქვა კალაძემ თბილისის მთავრობის სხდომაზე.

მანვე აღნიშნა, რომ "ყველამ ერთად უნდა ვეცადოთ, საახალწლო განწყობას კოვიდი ვერ და არ მოერიოს".

"ჩვენ გვინდა ერთიანობით და სოლიდარობით სავსე თბილისი. სოლიდარობა, ერთმანეთში გვერდში დგომა, ერთმანეთის მხარდაჭერა — ამაზე მაგარი არაფერი არ არის", — დასძინა კალაძემ.