ოქროს გლობუსზე მიღწეული წარმატების შემდეგ, სადაც ფილმმა ლა ლა ლენდი შვიდიდან შვიდივე ოქროს გლობუსი მიიღო, დემიან შაზელის კინოსურათი ტემპს არ აგდებს და მორიგ წარმატებას აღნიშნავს, 2017 წლის ოსკარზე ის 14 ნომინაციით იქნება წარმოდგენილი.

გარდა იმისა, რომ რაიან გოსლინგმა და ემა სტოუნმა საუკეთესო ქალი და კაცი მსახიობის ნომინაციები მიიღეს, ლა ლა ლენდი კი წლის საუკეთესო ფილმის ნომინაციისთვის იბრძოლებს, თავად რეჟისორი დემიენ შაზელი კენეტ ლონერგანსა და ბარი ჯენკინსს გაუწევს კონკურენციას საუკეთესო რეჟისორის ტიტულის მოსაპოვებლად.

ლა ლა ლენდი ასევე ნომინირებულია საუკეთესო ორიგინალური სცენარის, საუკეთესო მუსიკის, სიმღერის, მხატვრობის, კოსტიუმების, ოპერატორული ნამუშევრის, მონტაჟის და სხვა კატეგორიებში.

ოსკარის 14 ნომინაცია აქამდე მხოლოდ ორ ფილმს - ტიტანიკსა და ყველაფერი ევას შესახებ ჰქონდა.

ოსკარების დაჯილდოების ცერემონიის პირდაპირი ეთერი ტელეკომპანია GDS-ზე 27 თებერვალს, თბილისის დროით დილის 05:30 საათზე დაიწყება, მანამდე ღამის 02:00 საათიდან კი საშუალება გექნებათ ნახოთ ვარსკვლავური წითელი ხალიჩა.