პარიზში აქციაზე პოლიციამ ცრემლსადენი გაზი გამოიყენა და შინაგან საქმეთა მინისტრის განცხადებით, აქციის 22 მონაწილე დააკავეს. პოლიციასა და მოქალაქეებს შორის დაპირსპირება მეორე შაბათ-კვირაა გრძელდება. ამის შესახებ ინფორმაცია გამოცემა FRANCE24-მა გავრცელა.

მედიის ცნობით, აქციის მონაწილეები ახალ კანონპროექტს აპროტესტებენ, რომლის თანახმადაც, პოლიციელზე ფოტო-ვიდეო გადაღება იკრძალება. დემონსტრანტები ამტვრევენ მაღაზიის ვიტრინებს, ცეცხლს უკიდებენ მანაქანებს და ყვირიან — "ყველას სძულს პოლიცია".

საფრანგეთში აღნიშნული კანონპროექტის წინააღმდეგ საპროტესტო გამოსვლები მას შემდეგ დაიწყო, რაც გავრცელდა კადრები, სადაც სამი პოლიციელი შავკანიან მუსიკოს სცემს. გავრცელებული ინფორმაციის თანახმად, პოლიციელები მუსიკოს რასისტულ ნიადაგზე უსწორდებიან. აღნიშნულ კადრებს საფრანგეთის პრეზიდენტმა, ემანუელ მაკრონმა მიუღებელი და სამარცხვინო უწოდა.

ქუჩაში გამოსული ხალხი ამბობს, რომ ახალი კანონპროექტი ზღუდავს პრესის თავისუფლებას, რომელიც პოლიციის სისასტიკეს ამხელს. ამის საპირწონედ კი მთავრობა აცხადებს, კანონპროექტი პოლიციელებს დაიცავს, რომ მათ შესახებ ინფორმაცია ონლაინ ბოროტად არ გამოიყენონ.

ამ ეტაპზე პოლიციელები იდენტიფიცირებული არიან, მათ უფლებამოსილება შეუჩერდათ და საქმეზე გამოძიება მიმდინარეობს.

ახალ კანონპროექტს პარლამენტის ქვედა პალატამ მხარი გასულ კვირას დაუჭირა და ახლა სენატისგან დამტკიცებას ელოდება. აღნიშნულის თანახმად, პოლიციელის ფოტო-ვიდეო გადაღება სისხლის სამართლის დანაშაულად მიიჩნევა, რადგან ის პოლიციელის ფსიქოლოგიური ან ფიზიკური დაზიანების საფრთხეს შეიცავს. კანონდამრღვევს კი ერთწლიანი პატიმრობა ან 45 000 ევროს ოდენობის ჯარიმა ემუქრება.

მთავრობის მტკიცებით, კანონპროექტი მედიის ან მოქალაქეების თავისუფლებას არ ზღუდავს და მხოლოდ პოლიციელებს იცავს, რასაც ოპონენტები არ ეთანხმებიან.

საზოგადოების კრიტიკისა და გამოსვლების ფონზე საფრანგეთის პრემიერმინისტრმა განაცხადა, რომ კანონპროექტის მუხლის შესწორების მიზნით კომისიას მოიწვევს.