ქუთაისის ცენტრში მაკდონალდსთან ერთად სასტუმრო და ეკლესია აშენდება, თუმცა ქალაქში სწრაფი კვების ობიექტის მშენებლობის წინააღმდეგ აქციები კვლავ გრძელდება.

ადგილობრივი ტელეკომპანია რიონის ინფორმაციით, საინიციატივო ჯგუფმა ქუთაისის მომავლისთვის დღეს მორიგი აქცია გამართა.

აქტივისტებმა ბიზნესმენს და საქართველოს ყოფილ პრემიერმინისტრს ბიძინა ივანიშვილს მიმართეს და მოითხოვეს, რომ ადგილზე მაკდონალდსის ნაცვლად ეთნოგრაფიული მუზეუმი აშენდეს. მათი თქმით, ივანიშვილი ამ პროექტის განხორციელებას 2007-2008 წლებში აპირებდა.

ქუთაისში მაკდონალდსის მშენებლობას თავდაპირველად სამღვდელოებაც ეწინააღმდეგებოდა, თუმცა მოგვიანებით ცენტრში ეკლესიის ასაშენებლად ყოფილი რესტორანი თოლიას ტერიტორია გამოიყო.

მაკდონალდსს კომპანია ელემენტ კონსტრაქშენი აშენებს.