თბილისის მეტროს მემანქანეთა დამოუკიდებელი პროფესიული კავშირის, ერთობა 2013-ის განცხადებით, საკოორდინაციო საბჭოს გადაწყვეტილება, მუნიციპალური ტრანსპორტის, მათ შორის, მეტროს მუშაობის დროებით შეწყვეტის შესახებ, ნაწილობრივ მაინც, ინფიცირებული მემანქანეების რიცხვის ზრდას უკავშირდება.

"დღეის მდგომარეობით მხოლოდ დაინფიცირებული მემანქანეების რიცხვი უკვე 70-მდეა და უშუალოდ მატარებლის მოძრაობასთან დაკავშირებული პირები 30-მდე. შესაბამისად, 100-მდე მხოლოდ მატარებლის მოძრაობასთან უშუალო პოზიციაზე დასაქმებული თანამშრომელი ვერ ახერხებს მომსახურებას", — ვკითხულობთ, ერთობა 2013-ის განცხადებაში.

მემანქანეთა პროფკავშირის ინფორმაციით, მეტროს სრულფასოვანი მუშაობისთვის დღეში 120 მემანქანეა საჭირო, ხოლო, სულ დასაქმებულია 220 მემანქანე.

"გამომდინარე აქედან, სამუშაო გრაფიკს, უკვე რამდენიმე დღის განმავლობაში, ვეღარ ავსებდა ის რაოდენობა მემანქანეეებისა, რომლებიც ჯერ კიდევ ახერხებდნენ მუშაობას", — აცხადებენ ერთობა 2013-ში.

მათი ინფორმაციით, მემანქანეების გარდა, დაინფიცირებული თანამშრომლების რაოდენობა იზრდება მეტროს სხვა სამსახურებშიც.

"მოგეხსენებათ, რომ მეტროპოლიტენის გამართულ მუშაობას ვერ უზრუნველყოფს მხოლოდ ერთი რგოლი. ყველა სამსახურს და პოზიციას უკავია უმნიშვნელოვანესი ადგილი მგზავრთა უსაფრთხო გადაყვანაში და უმნიშვნელოვანესია მათი როლი, ისევე როგორც მემანქანეების", — ვკითხულობთ განცხადებაში.

ერთობა 2013 ასევე, ეხმაურება თბილისს მერის, კახა კალაძის განცხადებას იმის შესახებ, რომ საჭიროების შემთხვევაში მერია მემანქანეებს ბელარუსიდან ჩამოიყვანდა. პროფკავშირში ამბობენ, რომ სირცხვილია სამუშაოდ მოიწვიო ადამიანები ისეთ ქვეყანაში, რომელსაც ვირუსის გავრცელების ასეთი მაღალი მაჩვენებელი აქვს.

"თუ შეუძლია მერიას, რომ ბელორუსი მემანქანეები ამყოფოს სტერილურ სამუშაო გარემოში, ჩვენ მემანქანეებს რატომ არ შეუქმნეს იგივე გარემო? უნდა გაითვალისწინოთ ისიც რომ, მხოლოდ მემანქანეების ჩამოყვანა არ იქნება საკმარისი, სხვა თანამშრომელიც ბევრი დაგჭირდებათ. თუმცა რამდენად დაიცავთ მგზავრთა უსაფრთხოებას ამაზე როგორც ჩანს მერე იფიქრებთ", — მიმართავს ერთობა 2013 თბილისის მერიას.

25 ნოემბერს თბილისის მერმა, კახა კალაძემ განაცხადა, რომ მემანქანეების ინფიცირების გამო მეტროს მუშაობა არ შეჩერდებოდა, რადგან, საჭიროების შემთხვევაში მემანქანეების ბელარუსიდან ჩამოიყვანდა.

გუშინ, 26 ნოემბერს, საკოორდინაციო საბჭომ მიიღო გადაწყვეტილება 28 ნოემბრიდან 8 დიდ ქალაქში ყველა სახის მუნიციპალური ტრანსპორტის, მათ შორის მეტროს მუშაობის შეწყვეტის შესახებ.

ამავე დღეს, თბილისის მერიამ გაავრცელა განცხადება, რომ მეტროს დახურვის მიზეზი ინფიცირებული მემანქანეების რიცხვის ზრდა არ ყოფილა და ეს გადაწყვეტილება საკოორდინაციო საბჭომ ზოგადად, ქვეყანაში შექმნილი ეპიდვითარებიდან გამომდინარე მიიღო.

გაიგეთ მეტი: