საქართველოს პარლამენტში, იურიდიულ საკითხთა კომიტეტში მაუწყებლობის შესახებ კანონში შესატან ცვლილებებზე მომუშავე ჯგუფმა პირველი შეხვედრა გამართა. შეხვედრაზე განხილულ საკითხებს შორის საზოგადოებრივი მაუწყებლის სამეურვეო საბჭოსა და გენერალურ დირექტორს შორის უფლება-მოვალეობებისა და ვალდებულებების მკაფიოდ გამიჯვნისა და საბჭოს წევრების არჩევის წესები იყო. შეხვედრას საზოგადოებრივი მაუწყებლის თანამშრომლებიც ესწრებოდნენ.

პარლამენტის პრესსამსახურის ინფორმაციით, სამუშაო ჯგუფის წევრებმა აღნიშნეს, რომ საკანონმდებლო რეგულაციებმა საზოგადოებრივ მაუწყებელს განვითარებისა და თანამედროვე მოთხოვნების დაკმაყოფილების შესაძლებლობა უნდა მისცეს.

„მთავარი ამოცანა არის ის, რომ მკაფიოდ განისაზღვროს საზოგადოებრივი მაუწყებლის საქმიანობის მიზანი, რომ ის გამოხატავდეს იმ ძირითად არს, რაც კანონითაა დადგენილი, რომ მას ხელი არ შეეშალოს დამოუკიდებლად, მიუკერძოებლად და პირუთვნელად ემსახუროს საზოგადოების ინტერესებს, “ - განაცხადა იურიდიულ საკითხთა კომიტეტის თავმჯდომარემ, ეკა ბესელიამ.

მაუწყებლობის შესახებ კანონში ცვლილებების თაობაზე კანონპროექტის შემმუშავებელი სამუშაო ჯგუფის შექმნის გადაწყვეტილება იურიდიულ საკითხთა კომიტეტმა 6 იანვრის სხდომაზე მიიღო. ამ დღეს კომიტეტი მაუწყებლობის შესახებ კანონში საზოგადოებრივი მაუწყებლის თანამშრომელთა საკანონმდებლო წინადადებას განიხილავდა.