დღეს გირჩის ქუთაისის ოფისში მისულმა სალხინოს დედათა მონასტრის დიაკონმა, გიორგი ჯახუამ, განაცხადა, რომ შსს-ს თანამშრომლები ღამის საათებში მის სახლში წინასწარ გაფრთხილების გარეშე შევიდნენ.

ჯახუას განცხადებით, მისი სახლიდან სამართალდამცავებმა იარაღი და კანაფი ამოიღეს.

ჯახუას თქმით, მას ჯანმრთელობის პრობლემები აწუხებს და სახლში მოყვანილ კანაფს ტკივილების გამაყუჩებლად იყენებდა, ხოლო რაც შეეხება იარაღს, მისი თქმით, ის ანტიკვარი იყო, რომლითაც მისი შვილები თამაშობდნენ.

შსს-ში On.ge-ს განუცხადეს, გიორგი ჯახუა სასულიერო პირი არაა და მისი სახლიდან იარაღი არ ამოუღიათ. უწყების ცნობით, გამოძიება 260-ე მუხლითაა დაწყებული, რაც ნარკოტიკების უკანონო შეძენა-შენახვას გულისხმობს:

"ეს კაცი სასულიერო პირი არ არის, ამოღებულია ნარკოტიკული საშუალების შემცველი მცენარე, რამე სხვა კანონსაწინააღმდეგო ნივთი არ ამოგვიღია".