ახალ ათონში ვანდალიზმი ჩაიდინეს - კულტურული მემკვიდრეობის მსოფლიოში ცნობილ ანაკოფიის ციხეზე აღარ ფიქსირდება ადრექრისტიანული ქვის ფრაგმენტები ნახატებითა და წარწერებით. ინფორმაციას ამის შესახებ აფხაზური ინტერნეტ გამოცემა Apsnylife პუბლიცისტის, ლევ რეგელსონის ფეისბუკზე დაყრდნობით ავრცელებს.

ფოტო 1: ლევ რეგელსონი / Facebook / ფოტო 2: ლევ რეგელსონი / Facebook

როგორც რეგელსონი ფეისბუკზე წერს, აღნიშნული ფრაგმენტები ანაკოფიის ციხე-სიმაგრეში ახალი ათონის ბერებმა მე-19 საუკუნის ბოლოს მოათავსეს. ფრაგმენტები გარშემო მდებარე პატარა მღვიმეებიდან არის აღებული, სადაც ადრეული ქრისტიანები იმალებოდნენ. რეგელსონის ცნობით, სავარაუდოდ, ყველაზე ძველი ორი ფრაგმენტი ბერძნულ წარწერებს შეიცავს და 437 და 554 წლებით თარიღდება:

"ეს საკურთხეველი 100 წელზე მეტი ხნის განმავლობაში ინახებოდა და მეცნიერებისა თუ ტურისტების ყურადღებას იქცევდა მთელი მსოფლიოდან. ეს უმნიშვნელოვანესი ისტორიულ-არქეოლოგიური ძეგლი საბჭოთა ათეიზმის ეპოქასაც კი გადაურჩა. ახლა კი ის აღარ არსებობს." - წერს რეგელსონი.

სააგენტოს ცნობით, აფხაზეთის დე-ფაქტო რესპუბლიკის კულტურის სამინისტრომ აღნიშნულ ფაქტზე მოკვლევა დაიწყო და ამასთან დაკავშირებით განცხადებაც გაავრცელა.

განცხადების თანახმად, ანაკოფიის ციხე-სიმაგრეზე გარკვეული სამუშაოები მიმდინარეობს, თუმცა ფრაგმენტების დემონტაჟზე სამინისტროს ნებართვა არ გაუცია.

აფხაზეთში მდებარე კიდევ ერთი ისტორიული ძეგლის დაზიანებაზე ინფორმაცია 2017 წლის 3 იანვარს გაავრცელეს რუსულმა და აფხაზურმა წყაროებმა. აღნიშნული ინფორმაციის მიხედვით, აფხაზეთის რეგიონში რუსეთის საოკუპაციო ძალებმა სამხედრო პოლიგონის მომზადების მიზნით გაანადგურეს გულრიფშის რაიონის სოფელ წებელდასთან არსებული მრავალფენიანი არქეოლოგიურ-არქიტექტურული ძეგლი - VIII-IX და გვიანი შუა საუკუნეების ნასოფლარი, სამაროვანი, ეკლესიის ნანგრევი და ასევე XX ს-ის შუა ხანების პოლონელთა სასაფლაო.