პაკისტანელ ქალს 18 წლის შვილის ცოცხლად დაწვის გამო სიკვდილით დასჯიან, მან სასტიკი დანაშაული ე.წ. ღირსების მკვლელობის სახელით ჩაიდინა.

CNN-ის ცნობით, პარვინ ბიბიმ სასამართლოს განუცხადა, რომ მან შვილი "ოჯახის შერცხვენის" გამო მოკლა. მსჯავრდებულის მეორე შვილს, რომელიც მკვლელობაში მონაწილეობდა, სამუდამო პატიმრობა მიესაჯა.

ზინატ რაფიქი 18 წლის იყო, ის დედამ და ძმამ 2016 წლის ივნისში მოკლეს, რადგან მათი ნების საწინააღმდეგოდ დაქორწინდა მამაკაცზე, რომელიც უყვარდა. როგორც რაფიქის ქმრის, ჰასან ხანის დედამ ჟურნალისტებს განუცხადა, რაფიქი და ხანი ერთმანეთს სკოლის ასაკიდან ფარულად ხვდებოდნენ, 5-წლიანი ურთიერთობის შემდეგ კი, გოგოს ოჯახის ნების საწინააღმდეგოდ, 2016 წლის მაისში დაქორწინდნენ.

რაფიქი თავის ქმართან ერთად ცხოვრობდა. ის მშობლების სახლში მათთან შესარიგებლად დაბრუნდა, მაგრამ სახლში მისვლისთანავე დედამ და ძმამ საწოლზე დააბეს, ბენზინი დაასხეს და ცეცხლი მოუკიდეს.

ზინატ რაფიქი

მოგვიანებით პარვინ ბიბი თავად გამოცხადდა პოლიციაში, თუმცა როგორც თქვა, დანაშაულს არ ნანობდა.

ე.წ. ღირსების მკვლელობის გამო პაკისტანში 2016 წლის ოქტომბერში ახალი კანონი მიიღეს, ამიტომ, არც ბიბის და არც მის შვილს სასჯელი არ შეუმსუბუქდებათ, თუნდაც რომელიმე ოჯახის წევრმა მას დანაშაული აპატიოს.

კანონის მიღებამდე, ე.წ. ღირსების მკვლელობის სახელით მოქმედი მკვლელები თავისუფლები და დაუსჯელნი რჩებოდნენ. ახალი კანონის თანახმად, მკვლელი მინიმუმ 25 წელს გაატარებს ციხეში.

კანონის ცვლილება გახმაურებული ინციდენტების შემდეგ გახდა შესაძლებელი. ასეთ შემთხვევებს შორის იყო პაკისტანელი ვიდეო ბლოგერი ქანდილ ბალოხის მკვლელობა. მისი მკვლელი საკუთარი ძმა იყო და ის ამბობდა, რომ ამაყობდა თავისი საქციელით.

ე.წ. ღირსების მკვლელობის მოტივით, 2016 წლის პირველ ნახევარში პაკისტანში თითქმის 300 ქალი მოკლეს.