ევროპული საქართველოს ერთ-ერთი ლიდერის, გიგი უგულავას თქმით, არ აპირებს, პანდემიის გამო დაწესებულ შეზღუდვებს დაემორჩილოს და საღამოს 22:00 საათის მერეც აქციაზე დარჩება.

"ეს არ არის პარტიული გადაწყვეტილება, ეს არის ჩემი პირადი გადაწყვეტილება. სამართლებრივი გუნდი გვყავს შერჩეული, რომ საერთო სარჩელებით ვებრძოლოთ სასამართლოშიც, საკონსტიტუციოშიც", — განაცხადა გიგი უგულავამ.

უგულავას თქმით, ოპოზიციამ სამოქმედო სტარტეგია საპროტესტოდ განწყობილ ხალხზე უნდა ააწყოს და მათ დღის წესრიგს მოარგოს.

"საზოგადოება გვთავაზობს დღის წესრიგს და არ ჩვენ — პოლიტიკოსები. გეგმა არის დგომა და გამძლეობა. საბოლოო ჯამში ყველაფერი აქამდე დადის. თუ ჩვენ გვექნება მხნეობა და გამძლეობა, მოვიგებთ და მივაღწევთ თავისუფალ არჩევნებს. ეს არ არის ერთდღიანი და ორდღიანი პროცესი", — აღნიშნა გიგი უგულავამ.

მეორე დღეა ოპოზიციური პარტიების მიერ ორგანიზებული საპროტესტო აქციები მიმდინარეობს. რუსთაველზე შეკრებილი ხალხი საპარლამენტო არჩევნების შედეგებს არ აღიარებს და რიგაგრეშე არჩევნებს ითხოვს.

ამასთან, დღეს ამოქმედდა საკოორდინაციო საბჭოს მიერ დაწესებული ახალი შეზღუდვა, რომლის თანახმადაც, საღამოს 22:00 საათიდან დილის 05:00 საათამდე გადაადგილება იკრძალება და ჯარიმით ისჯება.