წინასწარი მონაცემებით, ჯო ბაიდენმა არჩევნებში დონალდ ტრამპი დაამარცხა, რაც იმას ნიშნავს, რომ ის და კამილა ჰარისი აშშ-ის არჩეული პრეზიდენტი და ვიცე-პრეზიდენტი არიან.

მათ უკვე მიიღეს მილოცვები მსოფლიო ლიდერებისგან, თუმცა მსოფლიო ყურადღების ცენტრში მათი ოჯახის წევრების მილოცვები მოექცა.

ჯო ბაიდენის ცოლმა, ჯილ ბაიდენმა ტვიტერზე გამოაქვეყნა ფოტო, რომელზეც ბაიდენს ახურავს ქუდი წარწერით: "ჩვენ, უბრალოდ, გავაკეთეთ. 46".

ამავე ფოტოში ბაიდენს ხელში უჭირავს პოსტერი წარწერით, "ვიცე-პრეზიდენტი ბაიდენი ცხოვრობდა აქ". ჯილ ბაიდენს სიტყვა ვიცე ხელით აქვს დაფარული და იკითხება: "პრეზიდენტი ბაიდენი ცხოვრობდა აქ".

"ის იქნება პრეზიდენტი ყველა ჩვენგანის ოჯახისთვის", — წერს ჯილ ბაიდენი.

მამასთან და ოჯახის წევრებთან გადაღებული ფოტო გამოაქვეყნა შვილმა, ნაომი ბაიდენმა. მედიების ინფორმაციით, ფოტო შედეგების გამოცხადების შემდეგაა გადაღებული.

კამალა ჰარისის ქმარმა, დაგ ემჰოფმაც შედეგების გაგებისას გადაღებული ფოტო გამოაქვეყნა და დააწერა, რომ ცოლით ამაყობს.

სიამაყით აღნიშნა დის გამარჯვება მაია ჰარისმაც.

წინასწარი მონაცემებით, ჯო ბაიდენი აშშ-ის 46-ე პრეზიდენტი გახდა, კამალა ჰარისი კი აშშ-ის ისტორიაში პირველი ვიცე-პრეზიდენტი ქალია. ბაიდენს გამარჯვება მიულოცა არაერთმა მსოფლიო ლიდერმა და ის არჩეულ პრეზიდენტად მოიხსენია, ამის ფონზე ტრამპი თავს გამარჯვებულად მიიჩნევს და შედეგებს არ აღიარებს.

დონალდ ტრამპი გახდა პირველი პრეზიდენტი 1992 წლის შემდეგ, რომელიც ამერიკელმა ხალხმა ხელმეორედ აღარ აირჩია.

გაიგეთ მეტი ჯო ბაიდენზე: