გირჩის ერთ-ერთი ლიდერი, იაგო ხვიჩია 31 ოქტომრის არჩევნების შემდეგ შექმნილ პოლიტიკურ ვითარებაში გამოსავალს ვადამდელ არჩევნებში ხედავს. ხვიჩიას თქმით, ქვეყანა ახლა პოლიტიკურ კრიზისშია, რომელიც ქართულმა ოცნებამ შექმნა. მისი განცხადებით, ხელისუფლებამ არჩევნებში 48% დაიწერა, ახლა კი ისეთი პროცენტი უნდა დაუწეროს საკუთარ თავს, რომლის შემდეგ მეორე ტურში ბრძოლას აზრი ექნება.

"48% არაფერს ემყარება, ხელისუფლების მოგონილი ციფრია და ოპოზიცია ამას ვაპროტესტებთ, რომ ეს გაყალბებული, ხელით დაწერილი ციფრია. ჩემი მოთხოვნა არის მარტივი: ამ გაყალბებული და ხელით დაწერილი ციფრის ნაცვლად, არ ვიცი რა ღონისძიებების შედეგად, მგონი ამაში ჩვენ საერთოდ არ უნდა შევიდეთ ხელისუფლება რას იზამს, საკუთარ თავს დაუწეროს ისეთი პროცენტი, რომლის შემდეგ მეორე ტურში ბრძოლას აზრი აქვს", — განაცხადა ხვიჩიამ TV პირველში.

ხვიჩიას თქმით, აქციებზე ყოფნა იმიტომ უნდა, რომ მეორე ტურს ჰქონდეს აზრი.

"ორი გამოსავალი აქვს ხელისუფლებას. პირველი, ან ნიშნავს ვადამდელ არჩევნებს. მეორე, დავუშვათ, არ ნიშნავს და ისე ხდება, რომ მარტო ქართული ოცნების 90 წევრი ზის პარლამენტში. რა ხდება ასეთ დროს? ან ხდება რევოლუცია, ან ხდება შუა აზია. მე არცერთი მინდა. მე მინდა რომ ვიპოვოთ გამოსავალი ნელ-ნელა, ყველას სახე რომ ჰქონდეს შენარჩუნებული ისე და დავუბრუნდეთ ნორმალურ პოლიტიკურ გარემოს. ვფიქრობ, ეს არის ამ წუთას სწორი გამოსავალი. მე ყოველშემთხვევაში აქციას ამის გამო მინდა შევუერთდე, რომ მეორე ტურს ჰქონდეს აზრი", — ამბობს გირჩის ერთ-ერთი ლიდერი.

31 ოქტომბრის საპარლამენტო არჩევნების შედეგებს ოპიზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს. დიდი აქციაა დაგეგმილი კვირას, 8 ნოემბერს პარლამენტის შენობასთან, რუსთაველის გამზირზე. ისინი ხელახალი არჩევნების ჩატარებას მოითხოვენ.