ისანში საოლქო საარჩევნო კომისიასთან მიმდინარე აქციაზე დაპირისპირდება მოხდა. როგორც On.ge-ს ჟურნალისტი ადგილიდან გვატყობინებს, პოლიციამ რამდენიმე ადამიანი წაიყვანა. ამ ეტაპზე დამატებითი ინფორმაცია არ არის ცნობილი. ჩვენ დავუკავშირდით შინაგან საქმეთა სამინისტროს და დეტალებს მიღებისთანავე შემოგთავაზებთ.

დაპირისპირება ისანში რამდენიმე წუთისწინაც მოხდა, რა დროსაც, უწყების ცნობით, 6 პირი დააკავეს.

საოლქო საარჩევნო კომისიებთან, სადაც საჩივრებსა და ოქმებს განიხილავენ, აქციები რამდენიმე საათია უკვე მიმდინარეობს, ადგილზე მობილიზებულია პოლიციაც.

ოქმების დათვლის პარალელურად, აქციები რამდენიმე უბანზე გაიმართა. მათ შორის, საბურთალოს საოლქო კომისიასთან. შინაგან საქმეთა სამინისტროს ინფორმაციით, აქ დაპირისპირების დროს სამი პირი დააკავეს. დაპირისპირება იყო ბათუმში მიმდინარე აქციის დროსაც. აჭარის პოლიციის დეპარტამენტის უფროსის, კოტე ანანიაშვილის თქმით, ამ დროს სხეულის დაზიანება სამმა ადამიანმა მიიღო.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.