ქართული ოცნების ერთ-ერთი წევრი, ანრი ოხანაშვილი ამბობს, რომ ქართული ოცნება, როგორც მმართველი და პასუხისმგებლიანი ძალა, არა მხოლოდ არ მიატოვებს საკუთარ ამომრჩეველს, არამედ ოპოზიციის მიერ "მიტოვებულ" ამომრჩეველზეც იზრუნებს. ამის შესახებ მან პარტიაში გამართულ ბრიფინგზე ისაუბრა.

"ჩვენ, სამწუხაროა, რომ გვყავს ოპოზიციური ჯგუფები, რომლებიც იმყოფებიან ნაციონალური მოძრაობის ტყვეობაში. ნაცმოძრაობა როგორც ხელისუფლებაში ყოფნის დროს ანადგურებდა ამ ოპოზიციას, ახლა უკვე, ოპოზიციაში ყოფნის დროს ჰყავს ტყვეობაში და ანადგურებს ოპოზიციურ ჯგუფებს. იმედგაცრუებულია იმ პატარა და ახალგაზრდა პარტიების მხარდამჭერი, ვინც მართლა, გულწრფელად დაუჭირა მხარი ამ პარტიებს და მიანდო მათ მანდატი, რომ ყოფილიყვნენ მათი ხმა საქართველოს პარლამენტში. იმედგაცრუებულნი არიან, ვინაიდან, აღმოჩნდა, რომ მათ მხარი დაუჭირეს, არა მათ რეალურ წარმომადგენლებს, არამედ თურმე ნაციონალურ მოძრაობას. ეს არის უპასუხისმგებლო ოპოზიციური ჯგუფების დღის წესრიგი, რომლებიც არაფრად არ აგდებენ საკუთარ ამომრჩეველს, პატივს არ სცემენ ქვეყნის დემოკრატიას და ჩვენს დასავლელ პარტნიორებს, რომლებიც როგორც ნეიტრალური დამკვირვებლები აფასებენ არჩევნებს, როგორც ლეგიტიმურს, კონკურენტულს და მთლიანობაში მოუწოდებენ ოპოზიციას, რომ შევიდნენ პარლამენტში. ჩვენ ვართ მმართველი ძალა, როგორც პასუხისმგებლიანი ძალა და ჩვენ ვიღებთ პასუხისმგებლობას ქვეყნის მართვაზე. ჩვენ ჩვენს საზოგადოებას გასაჭირში ვერ მივატოვებთ, განსაკუთრებით იმ დროს, როცა გვაქ მძიმე გამოწვევა პანდემიასთან დაკავშირებთ", — განაცხადა ოხანაშვილმა.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.