ამბროლაურში 14 იანვარს აეროპორტი იხსნება, რომელიც 16:00 საათზე პირველ თვითმფრინავს მიიღებს. მისი მგზავრი საქართველოს პრემიერ-მინისტრი გიორგი კვირიკაშვილი იქნება.

ამის შემდეგ, 18:00 საათზე კვირიკაშვილი ამბროლაურის აეროპორტის ახალ სამგზავრო ტერმინალს გახსნის.

საქართველოს მთავრობის ინფორმაციით, აეროპორტი პირველ ეტაპზე მცირე ზომის - 15-20 ადგილიან საჰაერო ხომალდებს მოემსახურება. ასაფრენ-დასაფრენი ზოლის სიგრძე 1 100 მეტრს შეადგენს, ხოლო აეროპორტის ტერმინალის ფართობი 600 კვ.მ.-ია და დაახლოებით 50 მგზავრის ერთდროულად გატარებაზეა გათვლილი.

"პერსპექტივაში გათვალისწინებულია უფრო დიდი ხომალდების მიღების შესაძლებლობა და მგზავრთნაკადის ზრდის შემთხვევაში - ტერმინალის გაფართოებაც" - აცხადებს მთავრობა.

საქართველოს მასშტაბით, რეგიონული აეროპორტების მშენებლობა, მთავრობის ოთხპუნქტიანი რეფორმების გეგმის, ყველაზე მოცულობითი - სივრცითი მოწყობის კომპონენტის, ნაწილია.