ექსპრეზიდენტი გიორგი მარგველაშვილი აცხადებს, რომ ოპოზიციის აქცია არჩევნების მეორე დღეს იყო თავისუფლების მოყვარული ერის პროტესტი ქურდობის წინაამღდეგ.

"დღეს იყო ემოციური შეკრების დღე, სპონტანური, შეურაცხყოფილი შეკრების დღე. ეს დღე შედგა, როგორც საქართველოს თავისუფლებისმოყვარული ერის პროტესტის თაღლითობის, პროტესტი თაღლითობის, ქურდობისა და ძალადობის მიმართ", — განაცხადა მან.

მისი თქმით, არ არის სავალდებულო, ოპოზიციამ პირველივე დღეს თქვას დათმობს მანდატებს, თუ გამართავს აქციებს ან რა ტაქტიკა ექნება. მისივე თქმით, გადაწყვეტილების მიღებამდე მათ უნდა იმსჯელონ და ეს ხანგრძლივი პროცესია, ამიტომ გასაკვირი არ უნდა იყოს თუ ჟურნალისტების კითხვებს ვერ უპასუხებენ.

"თავისუფლებისთვის ბრძოლა არის ხანგრძლივი პროცესი და ისევე, როგორც ნებისმიერ ტაქტიკურ პროცესში, ნებისმიერ დაპირისპირებაში, რბილად რომ ვთქვათ, აგრესიის გარეშე, ყველას აქვს თავისი ტაქტიკა. არ არის საჭირო, რომ ეს ყველაფერი დღემდე იყოს ნათქვამი", — განაცხადა მან მთავარი არხის ეთერში.

დღეს, პირველ ნოემბერს ოპოზიციამ საპროტესტო აქცია გამართა და ცესკოს დათვლილი არჩევნების შედეგები გააპროტესტა. ისინი არჩევნების ლეგიტიმურობას ეჭვის ქვეშ აყენებენ და მანდატებზე უარის თქმას განიხილავენ. ამ ეტაპზე ოპოზიციის ზუსტი გეგმები უცნობია. კვირას მათ მორიგი საპროტესტო აქცია დაგეგმეს.