ქართული ოცნების აღმასრულებელი მდივნის, ირაკლი კობახიძის განცხადებით, ის ფაქტი, რომ ერთიანი ნაციონალური მოძრაობის წევრები, დიმიტრი შაშკინი და კახა ოქრიაშვილი შეიარაღებულები დადიან, მიანიშნებს იმაზე, რომ მათ დესტრუქციული ზრახვები აქვთ.

"იარაღის ტარების უფლება აქვს ნებისმიერ დეპუტატს, ან ყოფილ სამართალდამცავს, მაგრამ როდესაც საარჩევნო პროცესს ეხება საქმე, იქ, ბუნებრივია, თითოეულ ჩვენგანს გვაქვს განსაკუთრებული პასუხისმგებლობა. იქ დაუშვებელია, რომ ვინმე იარაღით დადიოდეს. რაში სჭირდება ან დიმიტრი შაშკინს, ან კახა ოქრიაშვილს იარაღი, როდესაც საარჩევნო უბნებზე დადიან? არაფერში. ბუნებრივია, ძალიან ლოგიკური ეჭვები ჩნდება, რომ მათ აქვთ დესტრუქციული ზრახვები და იარაღის დემონისტრირებაც ამ დესტრუქციული სცენარის შემადგენელი ნაწილია. მათ მინდა ძალიან მკაფიოდ ვუთხრა, ნებისმიერი დესტრუქციის ქმედება იქნება მკაცრად პასუხგაცემული", — განაცხადა კობახიძემ.

დღეს რუსთავი 2-მა გაავრცელა ფოტო, სადაც ჩანს, რომ დიმიტრი შაშკინი ბოლნისში შეიარაღებული გადაადგილდება. აღნიშნული ინფორმაცია თავად შაშკინმაც დაადასტურა და განაცხადა, რომ იარაღი თავდაცვისთვის სჭირდება.

ასევე, ვრცელდება ინფორმაცია, რომ გაერთიანებული ოპოზიციის მაჟორიტარი დეპუტატობის კანდიდატი, კახა ოქრიაშვილი, ცეცხლსასროლი იარაღით გადაადგილდება. On.ge ამ დრომდე ცდილობს მასთან დაკავშირებას.

2020 წლის საპარლამენტო არჩევნების შესახებ

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: