თბილისის მერს, დავით ნარმანიას, რომელიც დღეს საკრებულოში ბოტანიკურ ბაღთან დაკავშირებით ანგარიშის ჩასაბარებლად მივიდა, ადგილზე არასამთავრობო ორგანიზაციების წარმომადგენლები ხმაურიანი საპროტესტო აქციით დახვდნენ.

ფოტო: ნინა კოპალეიშვილი

სამოქალაქო აქტივისტებმა პანორამა თბილისის წინააღმდეგ აქცია საკრებულოსთან გამართეს. მოგვიანებით, როცა დავით ნარმანიამ საკრებულოში სიტყვით გამოსვლა დაიწყო, საკრებულოს სხდომაში მისულმა მოქალაქეებმა გაშალეს საპროტესტო ბანერები, რასაც სხდომის დროებით შეჩერება მოყვა. საკრებულოს დაცვის სამსახურმა და პოლიციამ აღნიშნული მოქალაქეები იძულებით გაიყვანეს საკრებულოდან. მოქალაქეების იძულებით გაყვანაში მონაწილეობდა საკრებულოს წევრი ქართული ოცნებიდან ჯაბა ჯიშკარიანი. ამის შემდეგ სიტუაცია საკრებულოში შედარებით დაწყნარდა და დავით ნარმანიამ სიტყვით გამოსვლა განაახლა.

ფოტო: ნინა კოპალეიშვილი

როგორც თბილისის მერმა საკრებულოში სიტყვით გამოსვლისას განაცხადა, ბოტანიკურმა ბაღმა კომპანია ფინსერვისთან გაცვლის შედეგად გამწვანებული, განაშენიანებული ტერიტორია მიიღო. მისი თქმით, იქ არის სხვადასხვა ჯიშის ხეები, რაც საცდელი და ბოტანიკურ ბაღთან დაკავშირებული აქტივობებისთვის არის მნიშვნელოვანი. მისი თქმით, ის 4 ჰექტარი, რომელიც ბოტანიკურმა ბაღმა ფინსერვისთან გაცვალა, კლდოვანი მიწის ნაკვეთია, რომელიც გამოუსადეგარია.

"დასმული კითხვა, ვინ მოიგო ამ გარიგების შედეგად, პასუხი არის ძალიან მარტივი, ამით მოიგო ბოტანიკურმა ბაღმა", - მიიჩნევს ნარმანია.

ბიძინა ივანიშვილთან დაკავშირებული კომპანია შპს ფინსერვისი XXI-ის 2016 წლის 12 აპრილის მიმართვის საფუძველზე, თბილისის ბოტანიკური ბაღმა მას 4 ჰექტარი მიწა გაუცვალა, ხოლო 3 მაისს დამატებით 29 ჰექტარი მიწა მიჰყიდა დაახლოებით 6 მილიონ ლარად, რასაც მოქალაქეთა ნაწილისა და არასამთავრობოების პროტესტი მოჰყვა.