ქართული ოცნების აღმასრულებელი მდივნის, ირაკლი კობახიძის განცხადებით, ზუგდიდში მძარცველთან დაკავშირებული სპეცოპერაცია დასრულებული არაა და სწორედ ამის გამო საზოგადოებას დამატებითი ინფორმაცია არ მიეწოდება. ამის შესახებ მან ბრიფინგზე ისაუბრა.

ჟურნალისტებმა კობახიძეს ჰკითხეს, რატომ არ ავრცელებს შინაგან საქმეთა სამინისტრო განცხადებას და რატომ არ მიეწოდება საზოგადოებას და მედიას ინფორმაცია, რაზეც მან უპასუხა:

"თქვენ ვერ ხვდებით რატომ არ იცის [საზოგადოებამ]? სპეცოპერაცია ჯერ არ არის დასრულებული და იმიტომ არ იცის. სპეცოპერაცია როცა დასრულდება, ყველა დეტალთან დაკავშირებით გექნებათ ინფორმაცია", — განაცხადა კობახიძემ.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: