საქართველოს ყოფილი პრეზიდენტი მიხეილ სააკაშვილი გიგი უგულავას შესახებ სააპელაციო სასამართლოს გადაწყვეტილებას ფეისბუკზე ეხმაურება:

"მივესალმები გიგი უგულავას გათავისუფლებას უსამართლო პატიმრობიდან. მიხარია, რომ ის შობის დღესასწაულს აღნიშნავს თავის შვილებთან და მეგობრებთან ერთად".

სააკაშვილი აცხადებს, რომ გიგი უგულავას დანაშაული არ ჩაუდენია და არც არასწორი ქმედებები განუხორციელებია:

"მიუხედავად იმისა, თუ რა განაცხადა მან ბოლო სასამართლო პროცესზე იმ საკითხთან მიმართებით, რასაც ივანიშვილის ჯიბის პროკურორები უყენებდნენ მთელი ამ დროის განმავლობაში".

სააკაშილი აცხადებს, რომ უგულავას პატიმრობა სხვა არაფერი იყო, თუ არა ბიძინა ივანიშვილის პირადი შურისძიება:

"ეს იყო ოლიგარქისგან დაშინების კამპანიის ნაწილი. ამავე დროს, მგონი აღარავის ეპარება ეჭვი, რომ ასეთ გადაწყვეტილებებს აღარ იღებენ პროკურორები, ადვოკატები და სასამართლოები და რომ საქმე გვაქვს არა სამართლებრივ, არამედ ივანიშვილის პირად გადაწყვეტილებებთან, როგორც დაპატიმრებაზე, ისე გათავისუფლებაზე.

ამიტომ ჩვენ უნდა მოვთხოვოთ მას სხვა პოლიტპატიმრების დაუყოვნებლივ გათავისუფლება და ჩემთვის საქართველოში დაუბრკოლებლად ჩამოსვლის საშუალების მოცემა ჩვენს ხალხთან შესახვედრად და 20 იანვარს ერთიანი ნაციონალური მოძრაობის ყრილობაში მონაწილეობის მისაღებად".