პროკურატურამ ლელოს შტაბის წევრის ცემის საქმეზე დაკავებულს ბრალი წარუდგინა.

უწყების ცნობით, ბრალდებული 13 ოქტომბერს ქუთაისში მოტოციკლეტით გადაადგილდებოდა, რა დროსაც მანევრირების გამო წარმოშობილი ურთიერთშელაპარაკების ნიადაგზე ლელოს შტაბის წევრს სიტყვიერი და ფიზიკური შეურაცხყოფა მიაყენა.

პროკურატურის ინფორმაციით, სამართალდამცავებმა ბრალდებული იმავე დღეს დააკავეს და მას ბრალდება სისხლის სამართლის კოდექსის 126-ე მუხლის პირველი ნაწილით წარუდგინეს, რაც გულისხმობს ცემას, რამაც დაზარალებულის ფიზიკური ტკივილი გამოიწვია.

პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით ქუთაისის საქალაქო სასამართლოს უკვე მიმართა.

ლელოს ქუთაისის მაჟორიტარი დეპუტატობის კანდიდატმა, ანა ნაცვლიშვილმა 13 ოქტომბერს განაცხადა, რომ მათი შტაბის წევრს თავს დაესხნენ. მისი თქმით, მას თვალი აქვს დაზიანებული და ხელშია დაჭრილი. ნაცვლიშვილი შემთხვევის დაუყოვნებლივ გამოძიებასა და ქართული ოცნების ადგილობრივი ლიდერების მხრიდან პოლიტიკურ შეფასებას ითხოვს.