პარლამენტში მმართველი გუნდის დეპუტატი, ირაკლი ბერაია ამბობს, რომ "ნაცმოძრაობის მოკავშირე კუბილიუსი", აგრძელებს ქართული საზოგადოების გაოცებას რეალობას აცდენილი გამონათქვამებით. მისივე თქმით, შემაშფოთებელია, როდესაც ის სასაცილოს უწოდებს კარტოგრაფების საქმეზე ბრალდებულების დაკავებას.

"საინტერესოა რა რეაქცია ექნებოდა, იგივე რომ მის ქვეყანაში მომხდარიყო. კიდევ უფრო გაუგებარია მისი მხრიდან პანდემიის საწინააღმდეგო ნაბიჯების და ჩვენი ქვეყნის ეკონომიკის სრულიად უსაფუძვლო, მიკერძოებული შეფასება", — აღნიშნავს ბერაია.

მისივე თქმით, კუბილიუსზე მაღალი რანგის და ავტორიტეტული პოლიტიკოსები და ოფიციალური პირები მაღალ შეფასებას აძლევენ ერთის მხრივ, საქართველოში პანდემიის საპასუხოდ გადადგმული ნაბიჯების ეფექტიანობას და მეორეს მხრივ, ქართული ეკონომიკის მდგრადობას:

"შესაბამისად, ერთადერთი რამ, რაც სასაცილოა, თავად კუბილიუსის კომენტარია".

ლიეტუვის ყოფილი პრემიერმინისტრმა და ევროპარლამენტის წევრმა, ანდრიუს კუბილიუსმა აზერბაიჯანთან საზღვრის დელიმიტაციის საქმეზე ბრალდებულების დაკავებას სასაცილო უწოდა. კუბილიუსმა ტვიტერზე დაწერა, რომ ეს მაშინ ხდება, როცა ქართული ოცნება ოპოზიციას რეალური პრობლემებიდან ყურადღების გადატანაში ადანაშაულებს.