საგარეო საქმეთა მინისტრის მოადგილის, ლაშა დარსალიას განცხადებით საქართველოს გავლით სამხედრო ტვირთების გადაზიდვა მეზობელ რესპუბლიკებში კონკრეტული გადამზიდავისა და ტვირთის მფლობელის პასუხისმგებლობაა, რომლის დარღვევის შემთხვევაში პირს პასუხი საერთაშორისო სამართლის შესაბამისად მოეთხოვება. დარსალიას განმარტებით, მთიან ყარაბაღში ესკალაციის დაწყებისთანავე საქართველოს მხრიდან, სამხედრო დანიშნულების ტვირთების ტრანზიტი სახმელეთო და საჰაერო გზით როგორც აზერბაიჯანის, ასევე, სომხეთის მიმართულებით შეწყდა. მისივე თქმით, სამხედრო ტარნზიტი საქართველოს ტერიტორიის გავლით არ ხორციელდება.

"ჩვენს ხელთ არსებული დოკუმენტაციის თანახმად, ფრენები, რომლებიც საქართველოს საჰაერო სივრცეში სრულდება მხოლოდ ჰუმანუტარული და სამოქალაქო ხასიათისაა. ვატარებთ მხოლოდ, ჰუმანიტარულ, სამოქალაქო და კომერციული ხასიათის ტვირთს, რომელიც საერთაშორისო სამართლის ნორმებთან სრულ შესაბამისობაშია. მიუხედავად ამისა, საინფორმაციო საშუალებებში გააქტიურდა ინფორმაციით მანიპულირება თითქოსდა სამხედრო გადაზიდვები საქართველოს გავლით სამოქალაქო ფრენების მეშვეობით ხორციელდება. დარღვევის აღმოჩენის ან მყარი მტკიცებულებების არსებობის შემთხვევაში საქართველო შესაბამის რეაგირებას მოახდენს და დამრღვევებს პასუხი საერთაშორისო სამართლის შესაბამისად მოეთხოვებათ", — განაცხადა დარსალიამ.

ფოტო: კადრი ვიდეოდან/საქართველოს საგარეო საქმეთა სამინისტრო

საქართველოს საგარეო უწყება ყველას მოუწოდებს ჰუმანიტარული დერეფნები ბოროტად არ გამოიყენონ.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობდა, ყველაზე აქტიური მათ შორის ყარაბაღის სამხრეთ და ჩრდილოეთ ნაწილები იყო. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.