ქსნის საჯარო სკოლის დირექტორის, დოდო ჭოტოლაშვილის შვილი, ბექა ლილუაშვილი დედამისის სკოლის დირექტორის თანამდებობიდან გათავისუფლების მიზეზად მის ნაციონალური მოძრაობის წარმომადგენლებთან — კახა ოქრიაშვილთან და ცეზარ ჩოჩელთან მეგობრობა ასახელებს. ლილუაშვილი On.ge-სთან საუბარში აცხადებს, რომ დედამისი თანამდებობიდან გუშინ, 12 სექტემბერს გაუშვეს.

"ამ ორ ადამიანს [კახა ოქრიაშვილსა და ცეზარ ჩოჩელს] ვუდგავარ გვერდში და დავუდგები მუდამ, იმიტომ რომ ქვეყნისთვის კარგ საქმეს აკეთებენ. 7 წელია დედაჩემი მაგ სკოლაში მუშაობს, მანამდე თბილისის სკოლებში მუშაობდა", — ამბობს ბექა ლილუაშვილი.

მისივე თქმით, სკოლიდან გათავისუფლების გამო დოდო ჭოტოლაშვილი ცუდად გახდა და მისი საავადმყოფოში გადაყვანა გახდა საჭირო. ლილუაშვილი ამბობს, რომ ახლა დედამისი თავს კარგად გრძნობს.

განათლების სამინისტროში On.ge-ს განუცხადეს, რომ მათი მხრიდან არცერთი დირექტორის გათავისუფლება არ მომხდარა. უწყებაში განმარტავენ, რომ საქართველოს მასშტაბით საჯარო სკოლებში სამეურვეო საბჭოების მიერ არჩეულ დირექტორებს 2020 წლის სექტემბრიდან ეტაპობრივად ეწურებათ შრომითი ხელშეკრულების 6-წლიანი ვადა. განათლების სამინისტროს ცნობით, აღნიშნული ინფორმაცია საჯარო სკოლის ყველა დირექტორისთვის კარგად არის ცნობილი. მათივე ინფორმაციით, ყველა მათგანს აქვს შესაძლებლობა სამინისტროს მიერ გამოცხადებულ საჯარო სკოლების დირექტორთა შესარჩევ კონკურსში მონაწილეობა მიიღოს.