საქართველოს ექსპრეზიდენტი, გიორგი მარგველაშვილი საქართველო-აზერბაიჯანის საზღვრის საქმეზე დაკავებულებთან დაკავშირებით ქართული ოცნების ხელწერას ხედავს. ქვეყნის მე-4 პრეზიდენტმა მთავარი არხის ეთერში განაცხადა, რომ საზღვრის დელიმიტაცია-დემარკაციის საქმე არჩევნების წინ აგორებული პიარ ბომბია. მისი თქმით, წარმოქმნილი თემის შუაგულში ორი ადამიანი [ივერი მელაშვილი და ნატალია ილიჩოვა] დგას და მათი უფლებები და დანაშაულების პრეზუმფცია ირღვევა.

"ჩემი ქართულ ოცნებასთან ურთიერთობის გამოცდილებით, აბსოლუტურად ერთმნიშვნელოვნად ვხედავ იმ სტილს, ხელწერას, რომელიც ამ პოლიტიკურ ძალას არაერთხელ გამოუმჟღავნებია. გავიხსენოთ, ე.წ. ტრაქტორებისა და კაბელების საქმე. ჯერ გიჭერენ და მერე ამტკიცებ. შენ უნდა ამტკიცო, რომ აქლემი არ ხარ", — განაცხადა მარგველაშვილმა.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასათავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: