საქართველოს ეკონომიკის მინისტრის, ნათია თურნავას თქმით, მთავრობასთან "აქციებით საუბარი საჭირო არ არის", რადგან არ არსებობს რამე სერიოზული პრობლემა, რომლის შესახებაც არ იციან. ამის შესახებ მან მთავრობის სხდომის შემდეგ გამართულ ბრიფინგზე განაცხადა, როცა ბათუმის აქციის შესახებ დაუსვეს კითხვა.

"ჩვენი სამინისტრო, პრემიერ მინისტრის დავალებით, არის ერთგვარი ფრანტ ოფისი, ანუ წინა ხაზზე ვართ ჩვენ მთელი ამ თვეების განმავლობაში ტურიზმის ინდუსტრიასთან და გახსოვთ თქვენ, რომ არაერთი შეხვედრა შედგა ჩემს დონეზე, ჩემი მოადგილეების დონეზე, ტურიზმის ადმინისტრაციის დონეზე სხვადასხვა ტურისტული ინდუსტრიის წარმომადგენლებთან, ჯგუფთან, სათითაოდ კომპანიებთანაც. ჩემი დღის წესრიგის ნაწილი ამას ეთმობა ყოველთვის, იმიტომ რომ ვიცით, რომ კვლავაც პრობლემები გრძელდება და სერიოზული ყურადღება სჭირდება ამ ინდუსტრიას. მე არ მგონია, რომ რამე სერიოზული პრობლემა არსებობს, რომლის შესახებაც ჩვენ არ ვიცოდეთ და აქციებით ჩვენთან საუბარი არ არის საჭირო. ვინც კი დააპირა აქციის გამართვა, ყველა ჩემს კაბინეტში მოვიწვიე", — განაცხადა თურნავამ. [სტილი დაცულია]

თურნავა ასევე ამბობს, რომ არ ახსენდება მასთან ბათუმის აქციის მონაწილეებს შეხვედრა მოეთხოვოთ, თუკი მოითხოვენ, აუცილებლად შეხვდება.