პრემიერმინისტრ გიორგი გახარიას განცხადებით, როდესაც სამეზობლოში ნამდვილი ომი მიმდინარეობს, საქართველოსთვის ეს უდიდესი რისკია. გახარიას თქმით, გამოხმაურება იქნება თუ არა, ყველაფერი გაკეთდება იმისათვის, რომ შესაძლებლობის ფარგლებში მშვიდობის დამყარებაში წვლილის შეტანა მოხდეს.

"ჩვენ გვყავს როგორც სომეხი, ისე აზერბაიჯანელი მოქალაქეები და საქართველო პირდაპირ არის დაინტერესებული იმაში, რომ ნებისმიერი სახის გაურკვევლობა და კონფლიქტი რეგიონში მხოლოდ და მხოლოდ მოლაპარაკებების გზით მოგვარდეს და ამისთვის რაც შეგვიძლია, ყველაფერს გავაკეთებთ", — განაცხადა გახარიამ.

სომხეთ-აზერბაიჯანის სამხედრო დაპირისპირება მთიან ყარაბაღში ერთ კვირაზე მეტია გრძელდება. 27 სექტემბრიდან ფართომასშტაბიანი სამხედრო მოქმედებები მთიან ყარაბაღსა და სომხეთ-აზერბაიჯანის საზღვარზე ამ დრომდე მიმდინარეობს. დაღუპულებზე ორივე მხარე ავრცელებს ინფორმაციას. კონფლიქტში მონაწილე ორივე მხრიდან გარდაცვლილია 300-მდე, როგორც სამხედრო, ასევე, სამოქალაქო პირი, დაჭრილია 1 000-მდე მოქალაქე.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომხეთსა და მთიან ყარაბაღში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.

ამავე თემაზე: