საქართველოს პრემიერმინისტრის, გიორგი გახარიას განცხადებით, ჟენევის ფორმატის ჩაშლა კატეგორიულად მიუღებელია საქართველოსთვის, რადგან ის ერთადერთი ქმედით ფორმატი. ასე გამოეხმაურა გახარია რუსეთის მიერ მოლაპარაკებების 51-ე რაუნდის ჩაშლას.

"ჟენევა ჩვენთვის არის უკიდურესად მნიშვნელოვანი ფორმატი, რადგან ის არის ერთადერთი ქმედითი ფორმატი. ყველაფერი, ყველა ნაბიჯი, რომელიც ჟენევის ქმედითობას დააყენებს კითხვის ნიშნის ქვეშ, ჩვენთვის არის კატეგორიულად მიუღებელი, განსაკუთრებით კორონავირუსის პერიოდში, განსაკუთრებით მაშინ, როდესაც ელემენტარული საოკუპაციო ხაზზე გადასვლა არის ჩაკეტილი და ადამიანებს პირველადი სამედიცინო დახმარების მიღების ელემენტარული შესაძლებლობა არ აქვთ. მიუხედავად იმისა, რომ ჩვენ ვცდილობთ დავეხმაროთ მოქალაქეებს საოკუპაციო ხაზის მიღმა და, სამწუხაროდ, ჩვენ ამის შესაძლებლობა არ გვეძლევა, ჟენევის მოლაპარაკებების ასეთ დროს ჩაშლა არის მიუღებელი", — განაცხადა გახარიამ საკოორდინაციო საბჭოს სხდომის დასრულების შემდეგ გამართულ ბრიფინგზე.

დღეს საქართველოს საგარეო საქმეთა სამინისტრომ გაავრცელა ინფორმაცია, რომ რუსეთის ფედერაციის წარმომადგენლებმა ჟენევის საერთაშორისო მოლაპარაკებების 51-ე რაუნდი ჩაშალეს.