სომხეთში აცხადებენ, რომ დედაქალაქ ერევნიდან 50 კილომეტრში, კოტაიკის პროვინციაში მოწინააღმდეგის 4 უპილოტო საფრენი აპარატი გამოჩნდა. სომხეთის პრემიერმინისტრის განცხადებით, სამი უკვე ჩამოაგდეს და ახლა მეოთხეს ეძებენ.

სოციალურ ქსელებში ვრცელდება ვიდეოები, რომელთა ავტორები ამტკიცებენ, რომ კადრებში ჩანს, როგორ ჩამოაგდეს აზერბაიჯანული რაკეტები კოტაიკში.

ამ ეტაპზე დამატებითი ინფორმაცია უცნობია და გაურკვეველია, შეესაბამება თუ არა ეს კადრები რეალობას. სომხეთის თავდაცვის სამინისტრო მხოლოდ იმას აცხადებენ, რომ მოწინააღმდეგის უპილოტო საფრენი აპარატები ჩამოაგდეს.

რა ხდება ყარაბაღში

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომეთში და არცახში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.