თბილისის საქალაქო სასამართლოში 20 იანვირსთვის გადაიდო თეთრი ხმაურის მოძრაობის აქტივისტების, შოთა ხინჩაგაშვილისა და მირიან მალაყმაძის ადმინისტრაციული სამართალდარღვევის საქმის განხილვა. შსს ამტკიცებს, რომ 10 დეკემბერს, თბილისში, ნარკოტიკების მოხმარების დეკრიმინალიზაციის მოთხოვნით გამართულ აქციაზე, მათ კანონი დაარღვიეს.

სამართალდამცავები აქტივისტებს ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან, რაც პოლიციელისადმი ბოროტ დაუმორჩილებლობას გულისხმობს. მოგვიანებით, 27 დეკემბერს, მათ კი კიდევ ერთი მუხლი, შეკრებისა და მანიფესტაციის წესის დარღვევა დაემატა, თუმცა, დღეს მხოლოდ 173-ე მუხლთან დაკავშირებული დარღვევის განხილვა გაიმართა, რაც შეეხება მანიფესტაციის წესის დარღვევას, ეს პროცესი 3 იანვრისთვისაა ჩანიშნული.

მოსამართლე მერი გულუშავილმა დღეს დაცვის მხარეს უარი უთხრა ამ ორი საქმის ერთ საქმედ გაერთიანებაზე. დღესვე, სასამართლო პროცესზე უყურეს აქციის დროს გადაღებულ ვიდეოებს.

შინაგან საქმეთა სამინისტროს წარმომადგენელმა პროცესზე ხინჩაგაშვილისა და მალაყმაძისთვის ადმინისტრაციული პატიმრობის შეფარდება მოითხოვა.

პოლიციელები ამბობენ, რომ 10 დეკემბრის აქცია ნარკოტიკების მოხმარების დეკრიმინალიზაციის მოთხოვნით, მერიის შესაბამისი სამსახურების მხრიდან სანქცირებული არ იყო და აქტივისტები მათ მოთხოვნას "ბოროტად არ დაემორჩილნენ" და გზა მაინც გადაკეტეს. ადვოკატებმა სასამართლოზე მათ პასუხად თქვეს, რომ აქციაზე ბევრი ხალხი იყო, რამაც ბუნებრივად გამოიწვია მოძრაობის შეფერხება და ეს არ ყოფილა დაუმორჩილებლობა.

EMC-ის იურისტის, ანი ნასრაშვილის თქმით, რომელიც აქტივისტების ინტერესებს იცავს, აქციაზე იმდენად ბევრი ხალხი იყო, რომ შოთა ხინჩაგაშვილსა და მალაყმაძეს რომც სდომებოდათ უკან დახევა, ვერ დაიხევდა, რადგან ამაში ხელს ხალხის მასა უშლიდა:

"ჩვენ მიერ წარმოდგენილი მტკიცებულებებიდან დასტურდება, რომ აქციაზე მონაწილეთა რაოდენობის ზრდის გათვალისწინებით, შეუძლებელი იყო აქციის ისე ჩატარება, რომ არ მომხდარიყო ტრანსპორტის სავალი ნაწილის დაკავება. შესაბამისად, ამის შემდეგ პოლიციის თანამშრომელთა მოთხოვნა იმის თაობაზე, რომ გადასულიყვნენ გზიდან, გამოიწვევდა შეკრებისა და მანიფესტაციის უფლების ხელყოფას".

ნასრაშვილი მიიჩნევს, რომ სამართალდამცავებმა ხელი შეუშალეს მოქალაქეების შეკრებისა და მანიფესტაციის უფლების განხორციელებას და მათ 10 დეკემბერს გაუფრთხილებლად დააკავეს აქტივისტები.