29 დეკემბერს, 10 საათზე, თბილისის საქალაქო სასამართლოში თეთრი ხმაურის მოძრაობის მიერ 10 დეკემბერს პარლამენტთან გამართულ აქციაზე დაკავებული ორი პირის, შოთა ხინჩაგაშვილისა და მირიან მალაყმაძის პროცესი გაიმართება.

დაკავებულებს სამართალდამცავები ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან, რაც პოლიციელისადმი ბოროტ დაუმორჩილებლობას გულისხმობს. მოგვიანებით, 27 დეკემბერს, მათ კი კიდევ ერთი მუხლი, შეკრებისა და მანიფესტაციის წესის დარღვევა დაემატა, თუმცა, 29 დეკემბერს მხოლოდ 173-ე მუხლთან დაკავშირებული დარღვევის განხილვა გაიმართება, რაც შეეხება მანიფესტაციის წესის დარღვევას, ეს პროცესი 3 იანვრისთვისაა ჩანიშნული.

10 დეკემბერს, ადამიანის უფლებების დაცვის დღეს, ყოფილი პარლამენტის შენობის წინ აქცია დეკრიმინალიზაცია 2016 გაიმართა, სადაც შეკრებილები ნარკოტიკების მოხმარების დეკრიმინალიზაციას ითხოვდნენ.

მოძრაობის წევრები მიიჩნევენ, რომ ამ დღეს პოლიციამ აქციის მონაწილეებს თვითონ შეუზღუდა შეკრებისა და მანიფესტაციის უფლება და მათ ამ უფლების განხორციელების წესის დარღვევას ედავება:

"ეს მუხლი ხშირ შემთხვევაში მათ მიმართ გამოიყენება, ვინც მოქალაქეებს მანიფესტაციის უფლებას უზღუდავს და მონაწილეების წინააღმდეგ მისი გამოყენების პრაქტიკაზე დიდი ხანია ინფორმაცია არ გავრცელებულა".

თეთრი ხმაურის მოძრაობა აცხადებს, რომ არც ერთ მხარდამჭერს არ დატოვებს უსამართლო სისტემასთან პირისპირ. მოძრაობის აქტივისტები პროცესის პარალელურად სასამართლოს ეზოში შეიკრიბებიან და აქციაზე დაკავებულებს მხარდაჭერას გამოუცხადებენ.