სახელმწიფო უსაფრთხოების სამსახურის ყოფილი თანამშრომელი უარყოფს ბაჩალიაშვილის ოჯახის ადვოკატის მიერ გავრცელებულ ინფორმაციას, რომ ის თამარ ბაჩალიაშვილს მეხსიერების ბარათს აწვდიდა. სუს-ის ყოფილი თანამშრომლის ადვოკატის, დავით ხარატის თქმით, ინფორმაცია, რაც რამიშვილმა გააჟღერა სიმართლეს არ შეესაბამება.

"ჩემი დაცვის ქვეშ მყოფი ამბობს, რომ უბრალოდ მე ვესაუბრე მას [რამიშვილს], რომ ექსპერტიზების მიმდინარეობის დროს, რაზე გაემახვილებინა ყურადღება. თავისთავად, არც ფლეშკა და არც სხვა არაფერი, ჩემი დაცვის ქვეშ მყოფს ბაჩალიაშვილისთვის არ მიუწოდებია", — განაცხადა ადვოკატმა ფორმულას ჟურნალისტთან საუბრისას.

21 სექტემბერს, ბაჩალიაშვილის საქმის ადვოკატმა, მიხეილ რამიშვილმა განაცხადა, რომ სუს-ის ერთ-ერთი ყოფილი თანამშრომელი ბაჩალიაშვილს დავალებებს მეხსიერების ბარათით აძლევდა. მისი თქმით, მას პირადად დაუკავშირდა სუს-ის ყოფილი თანამშრომელი, რომელიც აღწერს, როგორი ურთიერთობა ჰქონდა ბაჩალიაშვილთან და როგორ აძლევდა გარკვეულ მითითებებს მას.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ბაჩალიაშვილის საქმეზე გამოძიება 143-ე მუხლით დაიწყო, რაც თავისუფლების უკანონო აღკვეთას გულისხმობს, შემდეგ კი, 24 ივლისს გამოძიებას სისხლის სამართლის კოდექსის 115-ე მუხლი დაემატა, რაც თვითმკვლელობამდე მიყვანას ითვალისწინებს.