ქუთაისში, ჭავჭავაძის გამზირზე მდებარე მიკროსაფინანსო ორგანიზაცია ინტელექსპრესის ფილიალიდან 300 000 ლარი მოიპარეს. როგორც ინტელექსპრესში აცხადებენ, შემთხვევა 19 სექტემბერს, გამთენიისას, 04:06 წუთზე მოხდა. ქურდებმა შენობის სარდაფიდან იატაკი ამოჭრეს და შენობაში ამ გზით შეაღწიეს. ორგანიზაციაში ამბობენ, რომ მძიმე დანაშაული დაცვის პოლიციის გულგრილი დამოკიდებულებით მოხდა, რომელმაც ინტელექსპრესს მნიშველოვანი ზიანი ვერ მიაყენა, თუმცა აღნიშნავენ, რომ მსგავსი ძარცვა თავისი შინაარსით ბოლო პერიოდში ფინანსურ დაწესებულებებში არ მომხდარა.

"დაცვის პოლიციამ საცავის გარე მიმდებარე ტერიტორიის დათვალიერება არ მოახდინა, რის შედეგადაც, როგორც შემდგომ აღმოჩნდა, დამნაშავეებს მიეცათ საშუალება რამდენიმე საათი ემუშავათ საცავში. დილის 9 საათზე შესულ თანამშრომელს დახვდა შემდეგი სურათი — საცავის 40-50 სანტიმეტრი სისქის ბეტონის იატაკში ამოჭრილი იყო 60X60 სანტიმეტრის ხვრელი, ხოლო რკინის სეიფი, სადაც თანხა ინახებოდა, იყო გაჭრილი და თანხა კი წაღებული", — აცხადებენ ინტელექსპრესში.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება სისხლისს სამართლის კოდექსის 177-ე მუხლით მიმდინარეობს, რაც ქურდობას გულისხმობს.