აზერბაიჯანში გამართულ თავდაცვის მინისტერიალში, რომელიც რეგიონში მშვიდობის შენარჩუნებას ეხებოდა, თინა ხიდაშელმა თურქეთისა და აზერბაიჯანის თავდაცვის მინისტრებთან ერთად მიიღო მონაწილეობა.

თავდაცვის სამინისტროს ინფორმაციით, სამი ქვეყნის თავდაცვის მინისტრები რეგიონში სტაბილურობის შესანარჩუნებლად სამმხრივ თანამშრომლობას აპირებენ.

მინისტრები შეთანხმდნენ სამხედრო განათლებისა და კიბერუსაფრთხოების სფეროების განვითარების მნიშვნელობაზეც.

შეხვედრის დასრულების შემდეგ თინა ხიდაშელმა ჟურნალისტებს უთხრა, რომ მინისტრები კიდევ ერთხელ შეიკრიბებიან ბათუმში ამ ზაფხულს:

"შევჯერდით დოკუმენტზე. იმედი მაქვს, ორივე მინისტრი გვეწვევა ბათუმში და ეს სამმხრივი მინისტერიალი და მისი საქმიანობა ფორმალიზებულ და ინსტიტუციურ სახეს მიიღებს".

შეხვედრაზე ქართულმა მხარემ მონაწილეებს იმ პროგრამებსა და პროექტებში თანამშრომლობა შესთავაზა, რომლებიც საქართველოში ნატოს დახმარებით ხორციელდება.

თინა ხიდაშელის თქმით, შეთავაზებაზე თანხმობა მიიღეს:

"საუბარი იყო სამმხრივ ფორმატში გასამართ სწავლებებზე. საქართველომ გამოთქვა სურვილი, რომ 2017 წელს უმასპინძლოს რამდენიმე ასეთ სწავლებას. განსაკუთრებით იმ პირობებში, რაც ჩვენ ნატოსთან თანამშრომლობით გაგვიჩნდა. ვფიქრობ, ღირსეულ პარტნიორობას გავუწევთ თურქულ მხარეს ამ შემთხვევაშიც - სწავლების მაღალი დონის ორგანიზებაში. ამაზე თანხმობა მივიღეთ, ასე, რომ მოვემზადებით 2017 წლის გაზაფხულისთვის".