საქართველოს პარლამენტის ქუთაისში დასაბრუნებლად ერთიანმა ნაციონალურმა მოძრაობამ საკანონმდებლო ორგანოში კანონპროექტი წარადგინა. პარტიის ოფისში დღეს გამართულ ბრიფინგზე განაცხადეს, რომ ქუთაისს საპარლამენტო და ადმინისტრაციული სტატუსი უნდა მიენიჭოს.

პარტიის თავმჯდომარისა და ქუთაისის მაჟორიტარობის კანდიდატის, გრიგოლ ვაშაძის განცხადებით, ქუთაისს საპარლამენტო ქალაქის სტატუსის დაბრუნებასთან ერთად, ქალაქის ბიუჯეტი უნდა გაიზარდოს.

"ისტორიულ-კულტური ქალაქი ამას იმსახურებს. ქუთაისს აუცილებლად დაუბრუნდება ის, რაც ქართულმა ოცნებამ წაართვა", — განაცხადა ვაშაძემ.

პარტიის საპარლამენტო ფრაქციის ხელმძღვანელის, რომან გოცირიძის თქმით, ქუთაისი უნდა გახდეს რეგიონის განვითარების სტიმული და ამისათვის მას საპარლამენტო და ადმინისტრაციული ქალაქის სახელი უნდა მიენიჭოს.

პრემიერ-მინისტრმა, გიორგი გახარიამ მიმდინარე წლის თებერვალში განაცხადა, რომ ქუთაისში არსებული პარლამენტის შენობის გაყიდვა იგეგმება.

პარლამენტის შენობა ქუთაისში ნაციონალური მოძრაობის დროს აშენდა და თბილისში ის მმართველმა პარტია, ქართულმა ოცნებამ თბილისში, ადგილობრივებისა და ოპოზიციის პროტესტის მიუხედავად, დააბრუნა.

2018 წელს ახალი კონსტიტუციის ამოქმედების შემდეგ, პარლამენტის ადგილსამყოფელად თბილისი განისაზღვრა. თავდაპირველად ვრცელდებოდა ინფორმაცია, რომ ქუთაისის პარლამენტის შენობაში შინაგან საქმეთა სამინისტრო მომსახურების ცენტრის ანალოგის განთავსებას გეგმავდა.

პრეზიდენტი სალომე ზურაბიშვილმა კი განაცხადა, რომ პარლამენტის ყოფილ შენობაში საკონფერენციო ცენტრი უნდა მოწყობილიყო.