ლუკაშენკომ პუტინს რამდენიმე სახის ახალი იარაღი სთხოვა. ამის შესახებ ინფორმაცია გამოცემა REUTERS-მა გაავრცელა.

მედიის ცნობით, ლუკაშენკომ აღნიშნა, რომ საპრეზიდენტო არჩევნების გამო მასობრივ პროტესტს ელოდება და იარაღიც ამიტომ სჭირდება. ამ თხოვნის შესახებ ლუკაშენკომ მინსკში რუსეთის თავდაცვის მინისტრთან, სერგეი შოიგუსთან გამართული შეხვედრისას განაცხადა.

კონკრეტულად რა ტიპის იარაღი სთხოვა ლუკაშენკომ პუტინს, არ დაუკონკრეტებია.

"ჩვენ შეგვიძლია სიტუაცია ვაკონტროლოთ არა მხოლოდ ბელარუსში, არამედ მის საზღვრებს გასწვრივაც", — განაცხადა ლუკაშენკომ.

გამოცემის ცნობით, ამჟამად ბელარუსი და რუსეთი საერთო სამხედრო წვრთნებს ატარებენ, რომელიც სექტემბრის ბოლომდე გაგრძელდება. ლუკაშენკომ კი აღნიშნა, რომ ორმა ქვეყანამ მსგავსი ტიპის კიდევ უფრო მეტი წვრთნა უნდა დაგეგმოს.

23 აგვისტოს მიმდინარე მასობრივი აქციის მონაწილეები დამოუკიდებლობის სახლისკენ დაიძრნენ, სადაც მათ სპეცრაზმი დახვდა. ხალხი გარკვეული დროით მიმდებარედ დადგა, ლოზუნგებს ყვიროდა და მოგვიანებით დაიშალა.

ამის შემდეგ კი რეზიდენციიდან ქვეყნის პრეზიდენტი ხელში იარაღით გამოვიდა. თან ახლდა 15 წლის შვილი, ნიკოლაი, სამხედრო ფორმაში, ბრონის ჟილეტითა და იარაღით. სპეცრაზმთან მიახლოების შემდეგ, ლუკაშენკომ მათ ლამაზები უწოდა, რის შემდეგაც "ლამაზმა სპეცრაზმმა" იგი ტაშით დააჯილდოვა.