დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

პრემიერმინისტრი გიორგი გახარია, მასწავლებლებსა და სასწავლო დაწესებულების იმ თანამშრომლებს, რომლებიც 15 აგვისტოდან აჭარაში ან სხვა ეპიდემიოლოგიური რისკების მატარებელ რეგიონებში იმყოფებოდნენ, მოუწოდებს სასწავლო წლის 2 კვირის განმავლობაში თავი შეიკავონ სამსახურში გამოცხადებისგან.

"მინდა მოვუწოდო ყველა იმ ადამიანს, განსაკუთრებით მასწავლებლებს ან სასწავლო დაწესებულების თანამშრომლებს, რომლებიც ბოლო 2 კვირის განმავლობაში, ან 15 აგვისტოდან იმყოფებოდნენ აჭარაში, ან სხვა ეპიდემიოლოგიური რისკების მატარებელ რეგიონებში, რა თქმა უნდა, საქმის კურსში ჩააყენონ განათლების სამინისტრო, შესაბამისი უწყებები და სასწავლო წლის პირველი 2 კვირის განმავლობაში თავი შეიკავონ სამსახურში გამოცხადებისგან", — განაცხადა პრემიერმინისტრმა.

მასწავლებლებს თვითიზოლაციისკენ მოუწოდა დაავადებათა კონტოლის ცენტრის ხელმძღვანელმა, ამირან გამყრელიძემაც.

"რეკომენდებულია, რომ ყველა მასწავლებელი, ვინც ამ პერიოდში, ბოლო 2-3 კვირის განმავლობაში ისვენებდა ან მოგზაურობდა ეპიდსიტუაციის გამწვავების კერებში, პირველ რიგში, აჭარაში, ასევე, შეიძლება ავიღოთ ლეჩხუმი, ეს სოფლები, აუცილებელია, რომ ამ მასწავლებლებმა დაიცვან პრევენციული ღონისძიებები. სასურველია, რომ 2 კვირის განმავლობაში არ გამოცხადნენ სამუშაო ადგილზე და იყვნენ აქტიურად თვითიზოლაციაში", — განაცხადა ცენტრის ხელმძღვანელმა.

მანვე აღნიშნა, რომ სამასწავლებლო კორპუსში ე.წ. რანდომული, შერჩევითი შემთხვევის პრინციპით მასწავლებელთა ტესტირება იგეგმება.

10 სექტემბრის მონაცემებით, საქართველოში კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი.