ევროპული საქართველოს მაჟორიტარობის კანდიდატი თელავის, ახმეტის, ყვარლისა და ლაგოდეხის ოლქში, ზურაბ ჭიაბერაშვილი, ლაგოდეხის მუნიციპალიტეტში, სოფელ არეშფერანის ამბულატორიის ინფრასტრუქტურულ გაუმართაობაზე საუბრობს.

ზურაბ ჭიაბერაშვილის თქმით, სოფელ არეშფერანის ამბულატორიის რემონტი, ტენდერით გათვალისწინებული ხელშეკრულებით, 2020 წლის მარტში უნდა დასრულებულიყო, თუმცა დღეს ის კვლავ უფუნქციოა. ჭიაბერაშვილმა აღნიშნა, რომ პანდემიის გარეშეც, მნიშვნელოვანია სოფლის ექიმისა და ამბულატორიის როლი სოფელში.

"კორონაკრიზისის გარეშეც, სოფლის ექიმი და ექთანი ადგილებზე ჯანდაცვის სისტემის საყრდენი უნდა იყოს. სოფლის ამბულატორიის როლი მითუმეტეს იზრდება ეპიდემიის შემოტევის პირობებში. ყველას გვინდა, კახეთი და მთელი საქართველოც, "მწვანე რეგიონად" დარჩეს, მაგრამ სისტემის მზაობა აუცილებელია. კრიზისის დაწყების დღიდან ჯანდაცვის სამინისტროს ამისკენ მოვუწოდებთ. ლაგოდეხის რაიონის სოფელ არეშფერანის ამბულატორიის რემონტი 2019 წელს ჩატარდა და ტენდერის პირობების მიხედვით, 2020 წლის მარტში უნდა გახსნილიყო. ამ ვადამ რამდენჯერმე გადაიწია, თუმცა ამბულატორიაში ჯერ ავეჯიც კი არაა შეტანილი და არავინ იცის, როდის გაიხსნება იგი", — აცხადებს ზურაბ ჭიაბერაშვილი.