სტრატეგია აღმაშენებლის ლიდერმა, გიორგი ვაშაძემ განაცხადა, რომ საქართველოში ერთხელ და სამუდამოდ უნდა დასრულდეს ანგარიშსწორება და მისი პრემიერობის დროს მიხეილ სააკაშვილს ქვეყანაში ჩამოსვლის შესაძლებლობა ექნება. ვაშაძის თქმით, მათ, ვისაც ქვეყნის აღმშენებლობაში ჩართვა სურს, ამის შესაძლებლობა უნდა მიეცეთ.

"როდესაც მე გავხდები საქართველოს პრემიერმინისტრი, ამ ქვეყანაში ანგარიშსწორებას და რევანშს დავამთავრებთ. მიხეილ სააკაშვილს ჩემი პრემიერობის დროს ექნება შესაძლებლობა საქართველოში ჩამოვიდეს. ხალხი გადაწყვეტს, თუ ვინ იქნება ქვეყანაში მთავარი ოპოზიციური ძალა. ვაპირებ პროდასავლური კოალიციის მიერ მხარდაჭერილი პრემიერმინისტრი ვიყო", — განაცხადა ვაშაძემ.

ექსპრეზიდენტმა, მიხეილ სააკაშვილის წინასაარჩევნო ვიდეომიმრთვა გაავრცელა, სადაც დაბრუნებას აანონსებდა. ამას მმართველი გუნდისა და ოპოზიციის წარმომადგენლების მხრიდან არაერთგვაროვანი შეფასებები მოჰყვა. იუსტიციის მინისტრმა, თეა წულუკიანმა აღნიშნულზე განაცხადა, რომ სააკაშვილის ჩამოსვლას მიესალმება და მას საზღვარზევე დაკავების პროცედურა ელოდება.