ამერიკის ეროვნული უსაფრთხოების საბჭო რუსი ოპოზიციონერის, ალექსეი ნავალნის, მოწამვლის გამო ღრმა შეშფოთებას გამოთქვამს და მიიჩნევს, რომ ქმედება უდავოდ დასაგმობია.

საბჭო ასევე აცხადებს, რომ იმუშავებენ საერთაშორისო საზოგადოებასთან, რათა რუსეთში მყოფმა დანაშაულის ჩამდენმა პირებმა პასუხი აგონ.

გერმანიის მთავრობის განცხადებით, ალექსეი ნავალნი "ნოვიჩოკით" მოწამლეს. ეს არის ქიმიური ნივთიერება, რომელიც ნერვიულ სისტემას ანადგურებს.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. გერმანელმა ექიმებმა დაადგინეს, რომ ის მოწამლულია.

2 წლის წინ სერგეი და იულია სკრიპალები, ქალაქ სოლსბერიში იგივე ნერვო-პარალეპტიკური ნივთიერებით, ე.წ "ნოვიჩოკით" მოწამლეს.

გავრცელებული იყო ინფორმაციაც, რომ მომწამვლელი ნივთიერების ყველაზე დიდი კონცენტრაცია სკრიპალის საცხოვრებელი სახლის, შესასვლელი კარის სახელურზე იყო დატანილი. პოლიციის ცნობით, გაზი "ნავიჩოკი" არეული იყო გაურკვეველ სითხეში და ამგვარი მეთოდით გადაიტანეს კარის სახელურზე.