აჭარის ავტონომიური რესპუბლიკის თავმჯდომარის, თორნიკე რიჟვაძის განცხადებით, ყვითელი მიკროავტობუსის სამარშუტო ხაზზე, რომელიც მოძრაობს ბათუმი-ხელვაჩაურის მიმართულებით, კორონავირუსის ახალი შემთხვევა გამოვლინდა. მისივე თქმით, საუბარია მიკროავტობუსის მძღოლზე.

აჭარის ავტონომიური რესპუბლიკის თავმჯდომარე მოუწოდებს იმ პირებს, ვინც აღნიშნული სატრანსპორტო საშუალებით იმგზავრეს, მიმართონ შესაბამის ცენტრებს და ჩაიტარონ ტესტირება.

დაავადებათა კონტროლის ცენტრის დირექტორმა, ამირან გამყრელიძემ განაცხადა, რომ, ბათუმში საკონდიტრო დონას 23 შემთხვევა უკავშირდება და ძირითადად თანამშრომლები არიან დაინფიცირებული.

"ჯერ არ გვაქვს ინფორმაცია, რამდენად გავიდა ინფიცირება დონას გარეთ", — განაცხადა გამყრელიძემ საკოორდინაციო საბჭოს დასრულების შემდეგ. ამის მიუხედავად, აჭარის ავტონომიური რესპუბლიკის თავმჯდომარემ, თორნიკე რიჟვაძემ განაცხადა, რომ ბათუმი არ ჩაიკეტება, თუმცა კაფე-ბარებში მონიტორინგი გამკაცრდება.