ჭყონდიდელის დასახლებაში მცხოვრები ადამიანების პროტესტს ევროპული საქართველოს რუსთავის მაჟორიტარობის კანდიდატი, ირმა ნადირაშვილი შეუერთდა.

ჭყონდიდელის დასახლების მოსახლეობა დახმარებას ითხოვს — რუსთავის მცხოვრებლების თქმით, მათი საცხოვრებელი კორპუსი სასწრაფო შეკეთებას საჭიროებს. სამგორის ექვსში მცხოვრებლები მუნიციპალიტეტს ბინების დაკანონებასა და კორპუსის შეკეთებას სთხოვენ. მათი განცხადებით, საცხოვრებელი ფართები სახიფათოა მცხოვრებთათვის. ადგილობრივების პროტესტს ევროპული საქართველოს რუსთავის მაჟორიტარობის კანდიდატი, ირმა ნადირაშვილი შეუერთდა. მისი თქმით, საცხოვრებელი ფართები ადამიანებისთვის საფრთხეს წარმოადგენს. ირმა ნადირაშვილი მოუწოდებს ადგილობრივ მთავრობას, დროულად უპასუხოს მოსახლეობის მოთხოვნებს.

"ჩვენ გვინდოდა, რომ აქ მერიის წარმომადგენელთან გვესაუბრა, თუმცა, სამწუხაროდ, წარმომადგენელი არ აღმოჩნდა აქ სამუშაო საათებში, ჩვენ აქ კონკრეტული პრობლემებით ვართ მოსული. ჭყონდიდელის დასახლებაში, ხალხს აქვს დაუკანონებელი სახლები, სავალალო მდგომარეობაში და სადენები პირდაპირ გარეთ არის გამოტანილი, ისე, რომ სახიფათოა საერთოდ ცხოვრებისათვის. ამიტომ, ჩვენ კიდევ მოვაკითხავთ მერიის წარმომადგენლებს, რადგან უნდა ვიცოდეთ, თუ როდის დაიწყება ამ სახლების დაკანონება ან გარემონტება, რადგან ადამიანების სიცოცხლე დგას საფრთხეში. ჩვენ ვითხოვთ, რომ კონკრეტული ვადები გვითხრან და აუცილებლად, ამის თაობაზე მოვალთ ამ შენობაშიც და მერიაშიც", — განაცხადა ნადირაშვილმა.

ირმა ნადირაშვილის მისვლის შემდეგ, ჭყონდიდელის დასახლებაში მუნიციპალიტეტის თანამშრომლები მივიდნენ. ისინი ადგილობრივებს დახმარებას დაპირდნენ.