თამარ ბაჩალიაშვილის დედა კვირას, 30 აგვისტოს გამოძიების გაჭიანურების გამო, ორთაჭალაში პროკურატურის შენობის წინ აქციას გეგმავს. ოჯახი გამოძიებას უნდობლობას უცხადებს.

"ის ტრაექტორია თამარს მარტო უნდა გაევლო. უნდა შემოეარა მთელი მარნეული და ვითომ მარტო მიდიოდა თავის მოსაკლავად და მეტი არაფერი. სავარაუდოდ ესენი მოკლე გზით გადავიდოდნენ და იქ დახვდებოდნენ და დასადგენია ის მოკლე გზა", — განაცხადა თამარ ბაჩალიაშვილის დედამ მთავარ არხთან ინტერვიუში.

პროკურატურამ დღეს უარყო, რომ სახელმწიფოს უსაფრთხოების სამსახურის 3 მანქანა თამარ ბაჩალიაშვილის ავტომობილს დაჰყვებოდა.

უწყების მტკიცებით, სუს-ის მანქანები ბაჩალიაშვილის ავტომანქანის უკან გზის მხოლოდ გარკვეულ ნაწილზე აღმოჩნდნენ, რის შემდეგაც შავნადაბას საწვრთნელი ბაზისკენ გადაუხვიეს. მათივე თქმით, ბაჩალიაშვილმა სვლა შეუფერხებლად გააგრძელა.

"აღნიშნული ავტომანქანები რუსთავის გზატკეცილზე, მხოლოდ გარკვეულ მონაკვეთზე აღმოჩნდნენ თამარ ბაჩალიაშვილის ავტომანქანის უკან, რის შემდეგაც თბილისი-მარნეულის გზატკეცილიდან აღნიშნულმა ავტომანქანებმა გადაუხვიეს გზიდან და შევიდნენ შავნაბადას საწვრთნელ ბაზაზე, ხოლო თამარ ბაჩალიაშვილმა კუთვნილი ავტომანქანით შეუფერხებლად გააგრძელა გადაადგილება ჯერ ფონიჭალის მიმართულებით, ხოლო შემდეგ თბილისი-მარნეულის გზატკეცილზე", — აღნიშნულია განცხადებაში.

მთავარი არხის გენერალურმა დირექტორმა, ნიკა გვარამიამ გადაცემა მთავარ აქცენტებში თქვა, რომ თამარ ბაჩალიაშვილს სუს-ის სამი ავტომობილი დაჰყვებოდა და უთვალთვალებდა. მან მანქანების სანომრე ნიშნებიც გაასაჯაროვა.