ბელარუსში მიმდინარე საპროტესტო აქციების აღსაკვეთად მთავრობა ჯარს გამოიყვანს. ამის შესახებ ბრიტანული გამოცემა Express წერს.

რუსული გამოცმა დოჟდის ცნობით, კი ბელარუსის თავდაცვის მინისტრმა განაცხადა, რომ ჯარი მეორე მსოფლიო ომის მემორიალთანაა მობილიზებული და წესრიგის დარღვევის შემთხვევაში, ხალხს საქმე უკვე არა პოლიციასთან, არამედ ჯართან ექნება.

Express-ის ინფორმაციით, გუშინ თავდაცვის სამინისტრომ აქციის მონაწილეები მსვლელობის დაწყებამდე 15 წუთით ადრე გააფრთხილა, რომ არმია ძალის გამოყენებას "არ მოერიდება". მინსკის პოლიციის უფროსმა კი დაამატა, რომ — "ახალგაზრდული მაქსიმალიზმის და მეამბოხე ქცევა შეუფერებელი და საშიშია".

23 აგვისტოს 100 000-ზე მეტი ადამიანი მინსკში დამოუკიდებლობის მოედანზე შეიკრიბა. ადგილობრივი მედია გამოცემა Tut.by-ს ცნობით, აქციის მონაწილეებმა, ასევე, მინგორისპოლკომისა და მეტროპოლიტენის შენობის მიმდებარე ტერიტორია დაიკავეს. მომიტინგეები სკანდირებდნენ: ''თავისუფლება ბელარუსს'' და ''წადი!''

გამოცემა ტასის ინფორმაციით, მოედანზე, აგრეთვე, წუთიერი დუმილით პატივი მიაგეს აქციის დროს დაღუპულ მომიტინგეთა ხსოვნას.

ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა. გარდაცვლილია სამი ადამიანი.