ევროპული საქართველოს ერთ-ერთი ლიდერი, ზუგდიდის მაჟორიტარობის კანდიდატი, გიგი უგულავა, ზუგდიდში გამსახურდიას ქუჩაზე და სოფელ ინგირში დევნილებს შეხვდა და მათი პრობლემები მოისმინა.

გიგი უგულავას თქმით, დევნილებს აქვთ უმძიმესი სოციალური და ეკონომიკური მდგომარეობა, არის უკიდურესი სიღარიბე, ხოლო მისი მთავარი პრიორიტეტი ამ პრობლემების მოგვარება იქნება.

გიგი უგულავას თქმით, ადამიანებს დევნილებზე ახსენდებათ მხოლოდ სიღარიბე და არა ის პოლიტიკური ტკივილი, რასაც ოკუპაცია ჰქვია.

"საქართველოში დევნილი უნდა დარჩეს როგორც პოლიტიკური სტატუსი და მას არ უნდა ჰქონდეს სოციალური დისკრიმინაციის სახე. 30 წლიანი დევნილობის შემდეგ ჩვენი თანამოქალაქეები ამას იმსახურებენ. დევნილზე ადამიანს არა სიღარიბე, არამედ ის პოლიტიკური ტკივილი უნდა ახსენდებოდეს რაც გვაქვს, ანუ ოკუპაცია. ეს არის მთავარი და მნიშვნელოვანი და ამ თვალსაზრისით მე მგონია, რომ დევნილ მოსახლეობაში სრული მხარდაჭერა იქნება, რადგან მათაც მობეზრდათ ის უაზრო დაპირებები, რასაც ქართული ოცნება აძლევს მათ", — აცხადებს გიგი უგულავა.