ევროპული საქართველოს ლიდერი დავით ბაქრაძე მხარდამჭერებს შეხვდა და ხულოს, შუახევის, ქედის მაჟორიტარობის კანდიდატი ტარიელ ნაკაიძე წარუდგინა. დავით ბაქრაძემ და ტარიელ ნაკაიძემ მოსახლეობას სიტყვით მიმართეს, ისაუბრეს ადგილობრივ პრობლემებზე, ცვლილებების აუცილებლობაზე და მხარდამჭერებს ევროპული საქართველოს სამომავლო ხედვა გააცნეს.

დავით ბაქრაძის განცხადებით, უმუშევრობისგან, სიღარიბისგან, უპერსპექტივობისაგან თავის დაღწევის ერთადერთი გამოსავალი ოქტომრბრის არჩევნებია. ტარიელ ნაკაიძემ უმცირესობების პრობლემებზე ისაუბრა და აღნიშნა,რომ ადამიანის უფლებები რეგიონში არ არის დაცული და გამარჯვების შემთხვევაში თავად იქნება ხალხის ხმა პარლამენტში.

"ხულოში ევროპულ სააქართველოს ჰყავს ძალიან ძლიერი კანდიდატი, ტარიელ ნაკაიძე, ადამიანი, რომელიც არის ამ საზოგადოების ნაწილი, ადამიანი, რომელიც ბევრი წელია ზრუნავს ქართველი მუსლიმი თემის კეთილდღეობაზე და მათი პრობლემების მოგვარებაზე, ადამიანი, რომელიც პარლამენტში მოვა არა საკუთარი ტენდერების, ბიზნესებისა და სასტუმროების ასაშენებლად, არამედ მისი რაიონის ფეხზე დასაყენებლად.

ეს არის ადამიანი, რომელსაც პატივს სცემს მთელი მთიანი აჭარა და დარწმუნებლი ვარ, რომ ევროპული საქართველო ხულოში იბრძოლებს გამარჯვებისთვის, როგორც პროპორციულ ნაწილში, ასევე მაჟორიტარობის ნაწილში. ჩვენ ყველა ოქტომბრის საპარლამენტო არჩევნების შემდეგ შევცვლით ჩვენ ცხოვრებას უკეთესობისაკენ", —განაცხადა დავით ბაქრაძემ.

შეკრებილებს მიმართა ტარიელ ნაკაიძემაც და განაცხადა, რომ ხულოელებით ამაყობს.

"ხულო არის ერთ-ერთი სერიოზული მუნიციპალიტეტი მაღალმთიან აჭარაში, რომელიც მრავალფეროვნებით გამოირჩევა. საქართველოს 44 მუნიციპალიტეტში ხულოელი ცხოვრობს, ძალიან ბევრი ხულოელი ცხოვრობს საქართველოს სხვადასხვა კუთხეში.

ხულოელები არიან ძალიან მშრომელები, მათი პრობლემები კი ჩემთვის ძალიან ნაცნობი და მნიშვნელოვანია, რადგან მეც ამ კუთხეში დაბადებული ვარ და ამ მუნიციპალიტეტის მკვიდრი. მე ვიქნები მათი ხმა, მათი წარმომადგენელი, მათი ტკივილების გამზიარებელი და ადამიანი, რომელიც მათი პრობლემების მოგვარებას აქტიურად შევუდგები. მჯერა, რომ ძალიან ბევრ კარგ საქმეს გავაკეთებ ამ ადამიანების მხარდაწერით", — განაცხადა ტარიელ ნაკაიძემ.